RM250 juta diagih ungkup projek nekat bah di Kuching, Sibu
KUCHING: Opis Menteri Pengeraja Asal enggau Rampa Menua ngagihka sepenyampau RM250 juta dikena bejalaika projek nekat bah di dua bagi menua nengeri tu, di Kuching enggau Sibu dikena mutarka penanggul bah tunggal di kandang menua nya.
Menteri iya, Dato Sri Wan Junaidi Tuanku Jaafar madah pengawa maduka serikat ngambi bejalaika program nya mega udah dipejalai, ke alai semina nganti dilanchar enda lama da agi Menteri Besai, Dato Sri Mohd Najib Razak enggau Kepala Menteri, Datuk Patinggi Abang Johari Tun Openg.
“Penyampau siling ti udah dikemendar ungkup Kuching iya nya RM150 juta lalu Sibu RM100 juta, ke alai hari ngelancharka iya deka dirandau aku enggau Menteri Besai enggau Kepala Menteri, enti Menteri Besai deka ngelanchar di Kuching, ke alai Kepala Menteri ngelanchar di Sibu,” ku iya.
Iya mansutka jaku nya lebuh dirandau pengudah bejadika Balai Mayuh Guna Dato Sri Wan Junaidi Kampung Tabuan Lot ditu, ke- mari.
Ngelansa silik, ku Wan Junaidi madah projek nyekat bah di Sibu sekali tu iya nya renggat ketiga enggau nyelinting kandang menua Bumiputera.
“Di Sibu, belanja kesemua projek nyekat bah iya nya RM890 juta ke alai naka diatu, kitai udah bejalaika projek beungkus RM300 juta lalu deka minta agih belanja ungkup renggat keempat dipejalai dalam taun baru,” ku iya.
Di Kuching ku iya, pejalai projek deka ngaul kandang menua ti udah dikelala napi penusah bah tunggal iya nya Batu Lintang, Stakan, Tabuan Melayu, Sungai Bedil, Gersik nyengkaum Sepital Besai Sarawak sereta beberapa genturung rumah perintah besai.
Iya mega meri jamin semua projek di kededua bagi menua deka dipejalai kunteriktor ari Sarawak.
Nyerumba program nya, Wan Junaidi mega ngemendarka pemeri penyampau RM100,000 dikena ngintu enggau ngangkatka pemanah balai komuniti Kampung Tabuan Lot ti ngangkatka nama iya.