Perintah nengeri enggaika pekara nya ngeruga penyerakup enggau pengelantang rayat pupu bansa ke udah lama dikemeran ditu
MIRI: Perintah nengeri deka seruran nyerenih sebarang ubah (undang-undang) ti tau ngeruga penyerakup enggau pengelikun kelebih agi bekaul enggau jalai pengarap baka isu murtad.
Menteri Bekal Ai enggau Elekterik Menua Pesisir Dato Sri Dr. Stephen Rundi Utom madahka perintah enggaika pekara ke bansa nya ngeruga penyerakup enggau pengelantang rayat pupu bansa ti udah lama dikemeran di Sarawak.
“Rayat Sarawak tau andalka perintah nengeri benung ngiga jalai ngaga ubah ba sebarang pekara ti tau ngerugi kitai kelebih agi bekaul enggau pekara pengarap, nyengkaum murtad.
“Perintah nengeri naka ulih ngerurun chara nentuka pengelikun enggau pengelantang meruan tegap ba semua bansa enggau jalai pengarap di Sarawak,” ku iya lebuhka bejaku ba pengerami ngintu genap taun begunan baru Gerija Holy Trinity enggau makai selamat ungkup Rev. Biskup Aeries Sumping Jinggan di sebengkah hotel tebilang malam kemari.
Ba pekara tu ku iya, perintah endang meruan beratika chara ngaga ubah ba sebarang pekara ti ngerugi rayat Sarawak dikena nentuka kitai seruran likun enggau lantang diau di Sarawak.
Iya ngelalau rayat di nengeri tu ngambika enda mudah nerima penerang ti dikerembai nengah media rama baka Facebook enggau Whatsapp tang beratika pengamat penerang nya.
“Penguna media rama diatu rindu agi mansutka penerang nengah Facebook enggau Whatsapp nitihka pengasai diri nadai meresa dulu lalu tu tau endar ngeruga pengelikun laban sekeda pekara chukup sensitif.
“Ulah mantaika penerang enda ditemu pengamat tau endar ngasuh charut kelebih agi bekaul enggau isu pengarap,” ku iya seraya nambah, mensia mayuh enda patut salah guna internet dikena naburka berita bula.
Iya ngelansa isu murtad ti nyadi di Kuching apin lama ke udah.
Ngelansa pasal pengerami lemai nya, ku Dr Rundi, tu nyadi kelai ngagai Lambir lalu iya meri terima kasih ngagai ex- ADUN Lambir Datuk Aidan Wing enggau Ripin nyaup juluk ngaga gerija nyadi nyata.
Gerija Holy Trinity di Lambir nerima agih belanja penyampau RM50,000 lalu ari penyampau nya, Dr Rundi ( 20,000), ADUN Lambir Ripin Lamat (RM10,000), ADUN Piasau Dato Sebastian Ting ( RM10,000) enggau Menteri Muda Kaunsil Kandang Menua Datu Dr Penguang Manggil (RM10,000) dikena melanja pejalai aktiviti gerija.
Sama bisi datai Biskup Diocese Kuching enggau Negara Brunei Darussalam Rev. Biskup Donald Jute, Rev. Biskup Solomon Cheong, Sebastian, Ripin, Penguang, Ketuai Unit Hal Ehwal Bukan Islam Dr Ngenang Janggu, Residen Miri Sherrina Hussaini, Datuk Bandar Adam Yii enggau Ketua Komuniti Iban bagi menua Miri ke lalu nyadi chairman pengatur Pemancha Wilson Siang Lim.