Dominic champion Pekit Lagu ‘Country’ Tanah Tinggi 2018
MARUDI: Kaunsilor Dominic Nyurang Ajang dipadu menggi gelar Pekit Lagu ‘Country’ Tanah Tinggi 2018 diatur di Long Lama, apin lama ke udah, ke alai pemujur iya nyadaka dua lagu English benama ‘Your man’ enggau ‘Blues Man’.
Lalu penuduk lumur dua dipenggi Pemesai Pelilih Telang Usan, Baru Tai enggau lagu dikumbai ‘Please Release Me’ seraya penuduk ketiga pulai ngagai Samuel Iwat, Kepala Pengajar SK Ubong Imang.
Perais trofi nyengkaum mata duit, lumur satu nerima RM300, lumur dua RM200 lalu lumur tiga nerima RM150. Seraya perais sagu ati bela pulai ngemai RM100 siku, lalu bisi tujuh iku pesereta ngambi bagi dalam pekit nya.
Pekit belagu tu dipeny- adi Kaban Kunsil Nengeri (ADUN) Telang Usan, Dennis Ngau lalu udah digulu Ketuai Penulung Direktor Seksyen Radio, Tabad Sakai, Kontroler RTM Miri, Zaidi Bujang, Penghulu Desmond Yap Ching Siang sereta bala kaunsilor di menua nya.
Pekit tu diatur beserimbai enggau program Sehati @ RTM ungkup Sitak Parlimen P.220 Baram diatur di Balai Komuniti SJK Kee Tee.
Berebak enggau Dennis Ngau berasai temegah meda pemanah timbal ari bala sida ke tuai ti berani ngambi bagi dalam pekit nya, taja Lagu ‘ Country ‘ jarang didinga rebak baru ngambika nemu tiun lagu sida ke tuai, tang tujuh iku pesereta tu naka ulih merindang bala ke bisi datai.
“Aku besemaya ngagai semua kita deka ngatur mayuh agi aktiviti di Long Lama baru lalu nitihka peminta mensia mayuh ngatur iya sebulan sekali. Lalu tu deka ngidupka Long Lama ngambika enda leju enggau aktiviti lalu tu ukai reti diatur RTM aja, tang mega ngelaluka beberapa ejensi perintah enggau NGO bela ngatur,” ku iya.
Ba pekit Lumba Asan ke alai Champion Bagi Lelaki pulai ngagai tim ari Kampung Uma Akeh, lumur dua Kampung Long Bemang, Apoh enggau ketiga Kampung Long Leng seraya perais sagu ati dipenggi Tim MDC, lalu Bagi Indu gelar Champion pulai ngagai Kampung Long Leng, lumur dua Raban Indu Long Bemang enggau ketiga Kemas enggau Palan Internet 1Malaysia seraya Tinggang Madang bulih penuduk lumur empat.