Bisi 300 pesereta mujur nyereta bengkel ‘jari emas’ enggau pengelikun diatur PKKS
MIRI: Bisi 300 iku pesereta ari lapan genturung pendiau di bagi menua Ulu Baram ngambi bagi ba Bengkel Jari Emas, Kelulut, Nagang Penyalah enggau Program Pengelikun diatur dua hari berunggu di Long Jeeh, Ulu Baram berengkah ari 26 ngagai 27 Febuari tu tadi.
Nitih ku chairlady pengatur, Annia Selalang Lawai, workshop tu keterubah iya diatur di bagi menua Ulu Baram ti diatur raban Biro Indu Serakup Nasional Kenyah Sarawak (PKKS).
“Workshop Jari Emas udah kala diatur beberapa kali tang suah agi iya diatur ungkup sida ke diau di mengeri.
“Taun tu, kitai bisi awak mulaika diri ngagai pun penatai lalu ngatur workshop ke bansa tu dikena ngajar, nambah eng- gau nyediaka awak ungkup peranak menua pesisir kitai ngambi chakah agi ngaul diri dalam asil kraf jari sereta mega pengawa betanam betupi,” ku iya madah ditu, kemari.
Ku Annia, tu mega keterubah iya sida ngatur workshop pasal Kelulut ti matak perati mayuh pesereta ngambi bagi dalam workshop tu.
Ku iya, tebal agi sida udah kala ninga pasal pengawa nginang Kelulut, tang enda kala bisi awak nemu tauka belajar silik agi pasal nya.
“Kami berasai gagit ngemai speaker ari opis Betanam Betupi meri licha pasal pengawa nginang Kelulut ngagai peranak menua pesisir kitai,” ku Annia madah seraya nambah, tebal agi bala pesereta ngembuan penemu ti rapas pasal nginang Kelulut, nya alai nengah workshop tu sida deka ngerembaika penemu diri.
Kelimpah ari workshop pasal kraf jari enggau Kelulut, licha workshop Nagang Penyalah enggau Pengelikun mega bisi diatur.