Sepital Kota Sentosa deka ngatur Aum Pengerai Untak Sarawak kena 9 -11 April
KUCHING: Sepital Kota Sentosa deka ngatur Aum Pengerai Untak Sarawak (SMHC) 2018 ungkup kelima kali berengkah 9 nyentuk ngagai 11 April tu.
Nungkatka rambai jaku ‘Broadening The Horizons of Mental Health in The Community’, aum deka ditur di seiti hotel ditu.
Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah madah aum dikearap ulih nerenak pemereti ngagai mensia mayuh sentang pekara pengerai mental.
Iya nyukung penuh aum nya sereta ngarap ulih mantu ngelunggar runding rayat sentang sakit mental lalu meransang mayuh agi orang sakit datai berubat.
“Kitai nagit 300 nyentuk ngagai 400 penyereta datai ngulu aum tu lalu ukai semina ungkup raban lutur enggau paramedik tang mensia mayuh mega dikelalu datai,’ku iya.
Iya mansutka jaku nya ba aum pengarang berita pengudah nerima penemuai raban pengatur SMHC 2018 di opis iya di Begunan Baitul Makmur ditu kemari.
Bela datai Pemesai Pen- gawa Berubat ari Spital Kota Sentosa Dr. Irena Michael Mijel enggau Dr Amanda Albert sereta Irene Yong ari Gempung Orang Indu enggau Ruang Bilik Sarawak.
Fatimah nambah, pengawa ngerijista ngulu aum nya dibuka nyentuk ngagai 2 April lalu maya ke penudi endur ngerijista tumu ditetap kena 15 March tu.
Aum dibagi ngagai dua sesi iya nya licha enggau wokshop lalu deka dipungkal enggau wokshop pra- aum kena 9 April ke alai deka bejuraika lima pekara.
Bayar enggau ngulu licha sereta wokshop iya nya RM600 ungkup orang ke ngerijista tumu enggau RM750 ungkup sida ke ngerijista laun iya nya sebedau 15 Mac.
Pengerijista tumu ke ukai lutur ditetapka mayar RM400 sereta RM450 enti ngerijista laun.
Aum mega dibuka ngagai penyereta ari menua luar nengah bayar USD300 seiku.
Penerang ke silik sentang aum tau betanya ngagai Ahmad Zamri/Dr.Nuraini/ Dr.Siti Khairunisa di nengah lumur 082-612132/321 tauka emel nuju 5thsmhc2018@ moh.gov.my.