Tanggungpengawa apai indai berat dikena nempa modal mensia ti menyana
SARATOK: Apai indai bejalaika pangku pengawa beguna endar ba pengawa nempa raban nembiak kemaya hari, pia ku Kaban Parlimen (MP) Saratok, Tan Sri William Mawan Ikom.
Ku iya, tanggungpengawa ngiring rebak tu ukai semina bepanggai ba raban sekula aja tang mega nyadi tanggungpengawa begulai antara apai indai sereta mega komuniti menua nya.
“Kitai ngarapka semua raban anang beratika pekara pia aja, laban pelajar enggau pekara bekaul enggau pengerembai rebak baru deka nyadi ketuai menua enggau bansa dudi hari nyadi tanggungpengawa semua raban.
“Anang meda pekara tu muntang dikereja. Ba tetiap pemansang ti ngaul pengerembai enggau pemansang rebak tu, kitai dekaka semua raban bela bejalaika pangku pengawa sida empu lalu ukai ngaga diri enda kiruh,” ku Mawan.
Iya mansutka jaku tu rambau Majlis Ju Gambeh di Sekula Primari (SK) Abang Moh Sessang, semak ditu, kemari.
Bisi 600 iku peranak datai ari bala ketuai komuniti, ketuai bansa enggau peranak genturung pendiau udah ngulu program tu ti diatur Serakup Apai Indai enggau Pengajar (PIBG) SK Abang Moh Sessang enggau kerejasama Komuniti 1Malaysia Kampung Sessang.
Batang tuju program diatur dikena neritka tanggam kaul raban sekula enggau komuniti ke diau di menua Sessang.
Kelimpah ari, program tu mega dikena nambahka penyedar bala apai indai sentang pangku pengawa sida nempa raban nembiak nyadi orang ti nampung pengawa menua dudi hari.
Berebak enggau nya mega, ku Mawan, penanggul rama raban nembiak kemaya hari patut diputar enggau jampat, sebedau iya balat agi nyadi.
“Baka ti ditemu kitai kenyau ari suba nyentuk diatu, penanggul salah guna dadah ngagai raban nembiak majak ngirauka ti, tambah mega penanggul tu udah ngelekai ngagai kandang menua pesisir.
“Nya alai, kitai meransang apai indai matau pengawa enggau kaul bala anak sida ngambika enda ngaul diri enggau penanggul baka nya.
“Tentuka bala bakih ti begulai enggau sida enda ngemai tauka ngumbik bala anak ngagai penanggul rama ke bansa nya,” ku Mawan nandu nyemetak.
Sama bisi datai Kepala Pengajar, Mohtaja@Mohtar Jaya, Chairman PIBG SK Abang Moh Sessang Razali Haji Sulong, enggau Penghulu Haji Kamaludin Mohd Rambli ke lalu nyadi Chairman Komuniti 1Malaysia Kampung Sessang.