Ketuai komuniti meseti madah tetiap penanggul ti ditapi

MIRI: Ketuai raban bansa patut bejalaika pangku pengawa ngenataika penerang tauka penanggul ditapi nembiak redak sida ngambika ditemu perintah.

Kaban Parlimen ( MP) Sibuti, Datuk Ahmad Lai Bujang madahka pekara tu beguna endar ngambika semua peminta tauka penanggul peranak ulih diputar nengah jalai ti patut.

“Perintah seruran ninga sebana rayat, taja pia, nyema penanggul enda dikenatai ngagai perintah ke alai mar iya deka diputar,” ku iya.

Iya mansutka jaku nya rambau ‘ Program Ramah Mesra Bersama Komuniti 1Malaysia’ ( K1M) sereta Taklimat Bajet 2018 diatur Opis Pemadah Miri.

Ku Ahmad Lai tetiap gen- turung pendiau tauka rumah panjai bisi ketuai raban bansa lalu pangku pangku pengawa nyemelaka atur ngintu pengelantang peranak.

Berindik ari nya, ketuai raban bansa diau semak agi enggau peranak lalu sida nemu agi pekara ti nyadi di renggat baruh.

“Nya kebuah perintah nyiri ketuai raban bansa ngambika sida ulih nyadi mata enggau pending perintah kelebih ba pekara pengelantang rayat,” ku iya nerang.

Ba lansa bukai, Ahmad Lai mega ngelalau rayat enda mudah pechayaka penerang ti dikerembai nengah media rama.

Nitih ku iya, ukai semua penerang ti dibantai nya betul enggau amat, tang bisi pekara sengaja dibantai bisi tuju bukai.

“Anang jampat pechaya enggau pekara dibacha kita, tang kitai patut meresa dulu pengamat penerang nya ngambika enda saru penemu,” ku iya.

Iya mega muji Opis Pemadah Miri ti mujur ngatur program nya nyadi pelasar ngagai bala komuniti bekunsika penerang dua kuing pejalai.

“Tanggungpengawa Opis Pemadah iya nya ngenataika penerang ti betul sereta amat lalu nentuka chuan penerang dikunsi begulai enggau enggau rayat,” ku iya nerang.

Berebak enggau program nya, Ahmad Lai mega bisi ngemendarka agih belanja penyampau RM2,000 ngagai lima bengkah K1M ba sitak Parlimen Sibuti.