JKKK meseti seruran nemu penanggul ti ditapi nembiak redak

SRI AMAN: Menteri Muda Pengelantang Komuniti Sarawak, Datuk Francis Harden Hollis meransang Komiti Pemansang Enggau Pengelikun Genturung Pendiau (JKKK) di nengeri tu bejalaika tanggungpengawa di renggat genturung pendiau enggau rumah panjai matau penanggul ti ditapi nembiak redak sida.

Nitih ku iya, tanggungpengawa JKKK ukai semina ngiring nembiak redak sida aja, tang mega dalam raban JKKK nya empu patut chakah gawa ngemansangka genturung pendiau sida empu.

“Aku enggai meda JKKK di sitak menua dipegai aku semina diau diri enggau ngambi nama aja, nadai ngereja sebarang ubah eng- gau pemansang di menua diri.

“Enti sema genturung pendiau enggau rumah panjai kitai seruran mansang lalu berubah nitihka seruyut jeman, tu ngayanka JKKK dia seruran chakah gawa,” ku iya.

Iya ke mega Kaban Kunsil Nengeri (ADUN) Simanggang mansutka jaku nya lebuh bejaku bejadika Program Mesra Rakyat diatur Opis Pemansang Mensia Mayuh ( KEMAS) Bagi Menua Sri Aman bepalan di Rumah Grain Kom, San Munggur, Sri Aman semak ditu, kemari.

Ngelansa silik, ku Harden, kelimpah ari berunding ngemansangka genturung pendiau, JKKK mega patut bejalaika pangku pengawa ngemanahka rampa genturung pendiau ke alai semangat pengawa beripai patut bisi ngambika endur diau seruran beresi enggau manah dipeda.

Berebak enggau nya, Harden mega nyemetak nyebut pasal sukung rayat patut seruran bisi laban perintah beguna dikena ngeyampatka agenda pemansang di nengeri tu sereta ungkup penegap politik.

“Rayat patut lantang ati ngasaika pemansang ti udah enggau benung dilanggur sereta deka dipejalai perintah berenggat,” ku iya nerang.

Iya mega merambu ngagai gerempung JKKK enggau Biro Indu patut chakah gawa ngatur aktiviti meri pemaik ngagai peranak di genturung pendiau seriris enggau peminta perintah ti dekaka semua rayat ngasaika pemansang menua.

Iya nyemetak madah seriris enggau komuniti di genturung pendiau bisi JKKK sida empu, ti deka mansang ba pekara pelajar patut dikemerat laban semina nengah pelajar kemaya hari aja ulih nyamin pengidup menyana agi.

Sama bisi datai Residen Bagi Menua Sri Aman, Indit Bangai, Pemesai KEMAS Sri Aman, Josipah Sabas, Pemesai Kaunsil Pelilih Sri Aman (MDSA), Tommy Laman, Pemesai ari Opis Entali Ai enggau Parit Sri Aman, Wong Ngu Hua, Ketuai Pekara Pansik Penyalah Indu Opis Polis Pelilih Sri Aman, Willy James, Pemesai Kanan Bomba I, Opis Bomba enggau Penyah Penusah Sri Aman, Bangga Baie, Pemesai Kanan Bomba II, Opis Bomba enggau Penyah Penusah Sri Aman, Jilin Itar, Pemancha Micheal John Sanggup sereta ketuai komuniti ke bukai.

Berebak enggau program nya, Harden mega bisi ngemendarka agih belanja penyampau RM5,000 ngagai JKKK Rumah Grain Kom, San Munggur seraya RM3,000 ngagai Biro Indu dikena bejalaika aktiviti sepanjai taun sida.

Program tu mega dirichah enggau pengawa mandang ari ejensi perintah, pekit ngelinsu nembiak mit enggau pekit poco poco.