Entulu nimbal munyi nya lebuh PBDSB madahka leka jaku ‘Dayak’ bedau diaku sereta diberi kuasa undang-undang
KUCHING: Menteri di Opis Menteri Besai Datuk Joseph Entulu Belaun nyemetak madah meri leka jaku ‘Dayak’ nyadi penegap undangundang endang beguna endar tang enda berumban lebuh iya nyebut nya disengkaum dalam Konstitusyen Malaysia “enda nentuka sebarang pekara”.
“Nyema ‘Dayak’ bisi dalam konstitusyen, nya agi enda nentuka sebarang pekara,” ku iya madah kemari lebuh dipinta nimbal penerang berita ari Parti Bansa Dayak Sarawak Baru (PBDSB) ke alai leka jaku ‘Dayak’ bedau diberi kuasa undang-undang kenyau ari siti pinta ngambika ngaku nya kenyau ari tiga taun ke udah.
Ku Entulu, bisi pematut patut perintah ke bisi diatu ti megai dua per tiga majoriti dalam parlimen sebedau nya mantaika ubah ba Konstitusyen Malaysia ngambika ngemasukka leka jaku Dayak ke dalam nya.
“Enti sema rang undangundang (ngubah konstitusyen ti nyengkaum leka jaku Dayak) dialahka, perintah deka berasai malu. Nya alai, baka atur sebarang perintah kemaya hari enda berani nyanggup berundingka bantu ari penyakal. Ke bendar, nyema penyandang perintah nganti konvensyen parlimen, parlimen enda tau enda direrak enti sema sebarang rang undang-undang iya dialahka. Tu mih pemerat isu rang undang-undang ti dialahka,” ku iya nerang.
Taja pia ku Entulu ke mega Kaban Parlimen (MP) Se- langau sereta Sapit Presiden Parti Rakyat Sarawak (PRS) madah, iya patut agi nyadi MP Selangau pengudah pengawa bepilih parlimen tu ila sereta mega, enti sema Barisan Nasional (BN) mujur ngulihka majoriti dua per tiga di parlimen, endang besai endar peluang iya ulih berandau enggau Menteri Besai mantaika rang undang-undang dalam penggal udah tu.
Sekretari Besai PBDSB Anthony Nais, ba penerang berita nyemetak madahka tiga atur patut dipejalai sebedau leka jaku ‘Dayak’ nyadi bansa bisi kuasa undang-undang.
“Nadai atur pengawa pe- madu beguna ari perintah kenyau ari tiga taun ke udah, pengudah dipesetuju ari Kabinet Besai deka nambah leka jaku Dayak ke dalam rintai bansa ti diaku di menua tu lalu ngaku pekara tu nyadi singkang kesatu,” ku Nais.
Anthony ke kala nyadi Sapit Ketuai Nembiak PBDS lebuh pegai Tajem, madahka perintah patut mantaika ubah dalam Parlimen ngambika ngembuan kuasa undangundang.
“Singkang ketiga ngagai Kunsil Nengeri (DUN) Sarawak ngemendarka pemutus Parlimen nya. Pengudah digaga, baru Dayak nyadi siti bansa ti ngembuan kuasa undang-undang.”
Iya nyemetak madah ke alai baka ke diatu, leka jaku ‘ Dayak’ semina pemutus ba pengatur pengawa aja ari Kabinet Besai ngambika bansa Dayak enda ibuh ngena leka jaku ‘lain-lain’ agi dalam pom perintah.
“Nadai sebarang singkang paradigma dipejalaika perintah Malaysia, pia mega pengari kitai Dayak semina diau diri aja,” ku iya.
“Diatu, kitai meseti meri iya kuasa undang-undang. Leka jaku ‘lain-lain’ iya nya dikena nyangkung orang bukai ti nulak diri dikumbai bansa Dayak tauka sida ti ukai bansa Melayu, China tauka India.”
Iya ngarapka Parlimen deka mantaika ubah enggau jampat.
“Baka nengeri tu, enda ngira sapa bagi nyaup mantaika nya, seagi pengawa nya dipujur.”
“Kitai enggai dikumbai ‘bansa ti enda dikemendar’ maya ngumbai diri empu bansa Dayak. Munyi baka ti enda dikemendar?” ku iya nandu.
Ku iya nambah, definisyen Konstitusyen Perintah Besai ba bansa asal mega patut dikemaru, ngambika sebaka enggau Konstitusyen Sarawak laban leka jaku Land Dayak, Sea Dayakenggau Murut udah dikemaru nyadi bansa Bidayuh, Iban’ enggau Lun Bawang.
“Tu siti ari mayuh pemar ditapi bansa Dayak. Tanya ditu iya nya, sekalika sida takut tauka dilatih ngambika takut mansutka jaku?” ku iya.
“Pengelubah enggau ‘pengelembau’ timbal bansa Dayak ba sebarang isu tmeri empas ba komuniti sida, ke bukai, nyadi sebagi ari kebuah bansa Dayak agi jauh tinggal di belakang ba mayuh pekara ari bansa bukai di Malaysia.
“Kitai patut ngangkatka diri empu lalu enda nejuka orang bukai ngayuhka kitai. Nyadi orang bukai ari ke nyadi kaki orang,” ku Nais.
Pekara ti dipetalat iya nya endur bansa ba semua pom perintah agi ngena leka jaku ‘Dan Lain lain’ ti madahka bansa bukai kelimpah ari Melayu, China enggau India, lalu nulis sebarang kaban komuniti Dayak ti asa dikumbai ‘Dan Lain Lain’ (ke bukai). Bisi sekeda orang udah nyengala madahka ‘ke bukai’ nyadi Aliens.
Nyema ‘Dayak’ bisi dalam konstitusyen, nya agi enda nentuka sebarang pekara. Datuk Joseph Entulu Belaun Menteri di Opis Menteri Besai