Guna internet enggau teknologi dikena ngangkatka pengawa dagang
KUCHING: Orang dagang diperansang nguna pemansang internet enggau teknologi dikena ngangkatka pengawa dagang setipak enggau polisi perintah nengeri, pemansang bepelasarka Ekonomi Digital.
Menteri Muda Orang Dagang enggau Pemansang Dagang Mit enggau Jelan Pemesai (PKS), Datuk Mohd Naroden Majais madahka mayuh bengkah teknologi enggau kuasa internet ke ulih mai ubah sereta ngubah chara gawa tauka dagang.
Dulu suba ku iya, semina bulih penerang ari surat kabar, bup, jurnal, radio tauka televisyen tang diatu jauh udah bida iya nya ngena teknologi ti semina muka komputer tauka telefon binching aja.
“Diatu kitai udah masuk jeman Ekonomi Digital. Nya kebuah polisi perintah nengeri dibaruh iring YAB Kepala Menteri Datuk Patinggi Abang Johari Tun Openg bejadika polisi pemansang bepelasarka Ekonomi Digital.
“Nya kebuah iya (Kepala Menteri) berani meri puku RM1 bilion dikena ngangkatka pemanah kuasa internet serata nengeri nyengkaum kandang menua ulu enggau pesisir Sarawak ngambika semua peranak bulih penerang nyengkaum bedagang ngena chara Online enggau ke bukai.
“Ke bendar internet nyadika kitai semua ba tikas ke sebela enda ngira sekalika kitai di mengeri tauka di menua pesisir, sekalika kompeni mit tauka besai, sekalika bisi bejuta ringgit tauka beratus ringgit aja.
“Laban semua kitai ulih ngena internet enggau teknologi ba jari kitai dikena ngelaku tauka iklan, ngulihka penerang enggau nempa kaul ba dalam pengawa dagang kitai,” ku iya.
Naroden ti mega Menteri Muda e-Dagang mansutka pekara nya lebuh bejaku ba Pengerami Bejadi Begunan Raya Khas sereta Ngelanchar Model Baru Van Golden Dragon, ke diatur ba Begunan Raya Khas ditu, kemari.
Iya nganti Kepala Menteri Datuk Patinggi Abang Johari Tun Openg bejadika Begunan Raya Khas enggau Model Baru Van Golden Dragon.
Polisi pemansang perintah sekalika ba renggat perintah besai tauka nengeri endang setipak enggau pemansang ke nyadi di serata dunya seagi mensia nempa teknologi sereta begunaka teknologi.
“Tu semua polisi perintah ungkup semua kitai ukai semina dalam dagang tang nyengkaum dalam bidang betanam betupi enggau ke bukai.
“Berindik ari nya, kitai rayat Sarawak kelebih agi enggau rayat Malaysia patut nyukung polisi perintah dikena ngema- juka kitai empu sereta nengeri enggau menua,” ku iya.
Dulu ari nya Naroden madahka diri empu temegah ati ngagai penyulut kompeni Raya Khas ke endang udah mayuh peneleba.
Peneleba kenyau 40 taun ke udah ti berengkah enggau kedai mit di Satok nyual beras udah nya betukar ngagai dagang palan servis kereta ungkup ejensi perintah nyentuk bulih lisin pengilang masang kereta komersial.
“Semua proses nya ditengah sereta diasaika enggau ati ti liat sereta penakal nyentuk ke nyadi sebuah kompeni Bumiputera ti nyulut.
“Pengeliat, penakal enggau pengarap diri iya nya sebagi ari pekara kualiti ti dikembuan orang dagang ke nyulut.
“Lalu kualiti tu bisi ba kompeni Raya (Raya Khas Sdn Bhd) ke ulih dichunto orang dagang bukai lebih agi orang dagang Bumiputera,” ku Naroden.
Ba pengerami nya mega Naroden ngemataka pengawa nyerahka Van Dikena Mai Bangkai ti disua Direktor Urusan Raya Khas Sdn Bhd Datuk Mohd Johnny Abdullah ngagai Chairman Lembaga Amanah Kebajikan Islam Igan Datuk Dr. Juanda Jaya ti mega Kaban Kunsil Nengeri (ADUN) Jamoreng.
Kelimpah ari nya Raya Khas bisi nyuaka pemeri RM2,000 ngagai Lembaga Amanah Islam Igan (LAKI) enggau Pertubuhan Kebajikan Islam (PERKIM) Igan.