Pemutus STPM 2017 bisi nambah manah
KUCHING: Pemutus peresa Sijil Tinggi Persekolahan Malaysia ( STPM) 2017 nengeri Sarawak ba tikas ti amat manah laban Purata Nilai Gred Keseluruhan (PNGK) bisi niki iya nya 2.64, dibandingka enggau PNGK 2.59 ba taun 2016.
Pekara nya dipadahka Direktor Opis Pelajar Nengeri Sarawak, Rakayah Madon nengah penerang berita, bekaul enggau pemutus peresa STPM 2017 ke dibantaika sereta serata menua, kemari.
“Pemutus STPM 2017 ba tikas ti amat manah laban ngayanka penambah ba PNGK ungkup Nengeri Sarawak dibandingka enggau taun 2016, iya nya ari PNGK 2.59 ba taun 2016 ngagai 2.64 ba taun 2017, niki sepenyampau 0.05.
“Ba semua nya, bisi 5,055 iku chalun (98.17 peratus) sekula mujur bulih setipikit STPM ba taun 2017 dibandingka 4,680 iku chalun (98.11 peratus) taun nyin kemari (2016) iya nya bisi nambah sepenyampau 0.06 peratus,” ku iya.
Lalu ari penyampau chalun nya, bisi 15 chalun (0.29 peratus) pas penuh dalam 5 mata pelajar (5P); 3,370 chalun (65.45 peratus) pas penuh dalam 4 mata pelajar (4P); 923 chalun (17.93 peratus) pas penuh dalam 3 mata pelajar (3P); 477 chalun (9.26 peratus) pas penuh dalam 2 mata pelajar (2P) sereta 270 chalun (5.24 peratus) pas penuh dalam 1 mata pelajar (1P).
Bisi 5,329 chalun udah ngerejista ngambi peresa STPM di Sarawak ba taun 2017 dibandingka enggau 5,290 chalun ba taun 2016. Ari penyampau nya 5,319 iku (99.81 peratus) chalun Sekolah Menengah Kebangsaan lalu 10 iku (0.91 peratus) chalun ngatika diri.
Bepelasarka pemutus seseiku chalun, bisi 51 tauka 0.96 peratus chalun Sekolah Menengah Kebangsaan Negeri Sarawak udah nyulut teulihka PNGK 4.00 (maksima) ba taun 2017.
Nambahka nya 1,726 tauka 33.59 peratus chalun teulihka PNGK 3.00 ke atas dibandingka enggau 1,428 tauka 29.94 peratus ba taun 2016 iya nya nambah 298 iku chalun tauka nambah sepenyampau 3.56 peratus.
“Dalam pemutus STPM 2017 ungkup Nengeri Sarawak bisi tiga (3) iku nembiak udah teulihka pemutus ti nyulut iya nya Bonnie Chong Kai Hui ari SMK Green Road, Kuching; Ervina Tang Sze Cheen (SMK Chung Hua, Sibu enggau Ebelind Min Slan- jat ari SMK St. Augustine, Betong.
“Lalu siku nembiak Nengeri Sarawak udah teulihka pemutus nyulut dalam peresa Malaysian University English Test (MUET) 2017 iya nya Wayne Ho Xiun Liang ari SMK Datuk Patinggi Haji Abdul Gapor, Kuching,” ku Rakayah.
Taun 2017 bisi 12 ari 21 mata pelajar ke diambi chalun Nengeri Sarawak ngayanka pemutus ti nyulut iya nya Bahasa Melayu 88.50 peratus dibandingka enggau 87.23 peratus ba taun 2016; Bahasa Cina 100 peratus (94.00 peratus 2016); Bahasa Arab 46.29 peratus (37.01 peratus 2016);
Syariah teulihka 89.47 peratus dibandingka ba taun 2016 88.15 peratus; Sejarah 86.29 peratus (81.21 peratus 2016); Geografi 87.79 peratus (82.39 peratus 2016); Ekonomi 74.69 peratus (72.69 peratus 2016); Perakuanan 100 peratus (96.55 peratus 2016); Matematik (M) 90 peratus (66.67 peratus 2016); Matematik (T) 82.80 peratus (80.40 peratus 2016; Biologi 90.60 peratus (84.81 peratus 2016) enggau Sains Sukan 100 peratus dibandingka enggau taun 2016 96.30 peratus.
Kelimpah ari nya bekaul enggau pemutus sekula, di Sarawak bisi 24 buah sekula terulihka pemutus STPM 2017 ti chukup manah iya nya PNGK lebih ari 2.80, ke bisi nambah empat buah sekula, enti dibandingka enggau taun 2016.
“SMK Sacred Heard, Sibu (PNGK 3.35) diberi gelar sekula ti bulih pemutus ke pemadu manah STPM 2017,” ku iya.
Semua chalun ulih meda pemutus peresa sida nengah sevis pesan pandak (SMS) enggau naip STPM < jarak> Result < jarak> No. Kad Pengelala sereta anjung ngagai 15888 tauka peda ba laman web Majlis Peperiksaan Malaysia ( MPM) ba www. mpm. edu.my kena 06.03.2018, pengudah pukul 12.00 tengah hari.
Lalu slip pemutus chalun ti bisi ubah pengudah ngapil meresa baru enggau ngubah ba slip asal, slip pemutus nya deka dianjung ngagai sekula ti bekaul. Chalun mega ulih meresa pemutus peresa sida ba portal MPM iya nya www.mpm.edu.my berengkah 02.03.2018.
Bekaul enggau pemutus peresa tu, chalun ke deka ngemetulka penerang diri ba slip pemutus patut ngenataika peminta kena tauka sebedau 20.03.2018 (Selasa).