Nengah pemutus peresa STPM ti baru pansut kemari udah ngeletakka sekula nya entara sekula ti nyulut dua taun bejurut
SIBU: Sekula Sekondari (SMK) Sacred Heart sekali agi udah ngaga sejarah ungkup sekula nya empu pengudah dalam rintai sepuluh sekula ti pemadu nyulut dalam Malaysia ba peresa Sijil Tinggi Persekolahan Malaysia (STPM) ti baru dipansutka kemari.
Nitih ku Penulung Kanan Form Enam SMK Sacred Heart Lai May Ging, sida udah mujur teulihka pemutus ‘Purata Nilai Gred Kumulatif’ (CGPA) 3.35 lalu 100 peratus pas.
Ku iya, pemutus ti nyulut tu iya nya kali kedua diulih sekula tu.
“Taun nyin kemari, sekula kami mega entara sepuluh sekula ti pemadu nyulut dalan menua tu, prinsipal kami iya nya David Teo udah nerima tanda basa nya tau nyin kemari lalu taun tu dijangka iya deka sekali agi ke Putrajaya ngambi anugerah ti sebaka,” ku iya lebuh aum media kemari.
Ku iya madah, sekula nya mega ba penuduk ti pemadu atas ba selampur Sarawak lalu taun tu iya nya udah ketiga kali ngetanka penuduk nya.
Ku iya, sida ngembuan 68 iku nembiak sekula ti ngambuan pemutus ti pemadu nyulut lalu ari penyampau nya, 12 iku sida udah teulihka pemutus A penuh.
Entara sida iya nya Wong Fong Fei, Christine Lau Lik Zi, Elaine Sii Liu Wen, Ha How Ung, Christy Law Siew Chin, Carmen Lim Mei Sze, Hwang Mee Ling, Kang Zhen Leong, Venessha John, Bika Nyambik, Lau Siew Chi sereta Roland Mecal.
Presiden Gerempung ExNembiak Sekula SMK Sacred Heart Hii Chang Kee udah madahka pengaga ati iya sentang penyulut ti diulih sekula nya.
Taun nyin kemari, sekula kami mega entara sepuluh sekula ti pemadu nyulut dalan menua tu, prinsipal kami iya nya David Teo udah nerima tanda basa nya tau nyin kemari lalu taun tu dijangka iya deka sekali agi ke Putrajaya ngambi anugerah ti sebaka. Lai May Ging Penulung Kanan Form Enam SMK Sacred Heart
Hii ke mega sekretari mendam Opis Menteri Dagang Temuai, Senia, Main Asal, Nembiak, Lumba enggau Main madah, pemanah rampa sekula udah narit pengingin bala nembiak ngambika belajar enggau bebendar.
“Aku ngarapka sekula enggau kerejasama sereta pengeransing bala pengajar enggau nembiak sekula deka terus ngulihka pemutus ti nyulut maya ti deka datai,” ku iya.
Kelimpah ari nya, Roland Mecal ti udah teulihka pemutus A penuh ngarapka ulih mantu sida sebilik nambahka penatai pemisi kelalu ngangkatka tikas pengidup sida.
“Aku datai ari ruang bilik ti kurang penatai pemisi. Indai aku enda bekereja lalu apai aku semina bepenatai pemisi unrung RM1,000 ninting bulan.
“Nambahka nya, aku mega ngembuan siku menyadi indu ti benung besekula ba SMK St Elizabeth. Dikena mantu kami sebilik ngangkatka tikas pengidup, aku meseti belajar enggau bebendar sereta enda leju,” ku iya.
Roland, ti penatai asal ari Rumah Nyala, Song madahka iya udah bebendar deka ngulihka pemutus nya lalu endang chukup gaga ati enggau asil ke udai diterima iya.
“Ku aku, pengeransing kitai ngaga pengawa iya nya kunchi ti berat nyema siku nembiak sekula deka mujur. Enda ngira sapa kitai, kitai deka ngulihka asil ti manah nyema kitai ngaga pengawa enggau bebendar,” ku iya seraya nambah madahka pemutus peresa SPM iya sebedau tu iya nya 4A, 3B enggau 1C.
Iya madahka diri deka nyambung pelajar ba Universiti Malaya tauka Universiti Kebangsaan Malaysia dalam bidang pelajar undang-undang (law).