Sarawak deka ngemansangka Digital Ekonomi nunda Singapore
SINGAPORE: Singapore enggau Sarawak kemari nyain Sempekat Pemereti Ati (MoU) ngepunka kerejasama dalam pekara palan bayar digital mobil (Mobile Digital Payment Platform tauka MDPP).
Kepala Menteri Datuk Patinggi Abang Johari Tun Openg nguluka raban pemesai bukai ari Sarawak, dalam penemuai sida iya ngagai Singapore, dalam kandang dua hari tu, besaksika pengawa nyain MoU nya.
Kilah ke tengahari kemari, Kepala Menteri mega bisi nemuai meri basa ngagai Menteri Besai Singapore, Lee Hsien Loong ba Istana di Jalai Orchard, lalu nangkan nya baum enggau Menteri Wang Singapore, Heng Swee Kita ba opis menteri nya, di High Street.
Sama bisi enggau ngulu nyain MoU nya kemari, Menteri ke betanggungjawab dalam pekara bekait enggau ‘Smart Nation’ Singapore, Dr. Vivian Balakrishnan, Sapit Kepala Menteri Sarawak, Datuk Amar Douglas Uggah anak Embas, Tan Sri Datuk Amar James Jemut Masing, Sekretari Perintah Menua Sarawak, Tan Sri Datuk Amar Morshidi Ghani enggau Duta Malaysia ke Singapore, Dato’ Zulkifli Adenan.
Kelimpah ari nya, sama bisi enggau ngulu MoU nya, Menijer Besai Opis Penguasa Multimedia Sarawak (SMA), Dr. Zaidi Razak enggau Ketuai Pegawai Eksekutif (CEO) Network for Electronic Transfers (Singapore) Pte Ltd (Nets), Jeffrey Goh.
Nangkan atur pengawa nya, Sekretari Perintah Menua Sarawak, Tan Sri Datuk Amar Morshidi Ghani bisi mega nguluka raban ari opis perintah Menua Sarawak sereta kaban kunsil SMA ngelawa Opis Dagang enggau Industri Singapore, alai sida iya bisi diberi licha ulih pemesai opis nya.
Kepala Menteri enggau pemesai Sarawak bukai datai di Singapore kena hari Minggu tu tadi, ngiga peluang kerejasama enggau Perintah Menua Singapore kelebih agi dalam pekara ekonomi digital.