Palan iCom Square palan kedua Servis ‘e-hailing’ GRAB ngetu
KUCHING: Rayat Sarawak dilalau ngena pemisi teknologi ukai semina ke servis aja tang kena ngulihka pemisi nengah pengawa dagang.
Menteri Opis Kandang Menua enggau Pengawa Berumah Datuk Dr Sim Kui Hian madah, dikenyadika chunto, iya nya servis ‘e-hailing GRAB’, ke kena ngulihka pemisi.
“Kitai suah endar ninga orang madahka gaya ekonomi diatu enda manah tauka tusah ngiga pengawa, pekara tu nyadi laban kitai seruran meda chara konvensional (chara lama).
“Enti kitai beratika chara konvensional, pelaba aku mayuh batang pengawa deka punas kelebih agi baruh Revolusi Industri 4.0. Nya kebuah, kitai meseti beratika teknologi kemaya hari tu, digaga nyadi pengawa dagang kitai nyengkaum servis GRAB,” ku iya.
Iya madah munyi nya lebuh bejaku ba aum pengarang berita pengudah ngepunka ‘ Grab Car Stand’ ti bela digulu ulih Menijer GRAB sitak Borneo, Kelvin Lam, Pemungkal sereta chairman iCube Innovation Datuk Patrick Liew enggau Direktor Eksekutif Raban Syarikat Nationlink, Chai Kun Seng di iCom Square ditu, kemari.
Dr Sim nandu baru, madahka pengaga ati iya laban GRAB milih iCom Square nyadi siti agi palan alai tu, kedua iya palan alai kerita GRAB ngetu di bandar raya tu.
Iya madah iCom ukai semina nyadi hab digital ke Kuching tang ngembuan mayuh endur makai, lalu bisi maya mega pedis ngiga endur paking kerita.
“Ngemutarka penanggul paking kerita diatu ukai semina nengah chara ngaga mayuh agi endur paking kerita tang ngena servis baka GRAB tu.
“Iya mega ngubah chara pengangkut mensia mayuh kemaya hari tu, kelimpah ari ngaga perambu bandaraya ke manah agi,” ku iya, lalu nandu baru madahka servis GRAB jimat endar enti orang nya milih ngena servis baka GRAB.
Ku iya, ambika chunto, siku orang ke bisi kerita, sida iya dipelaba begunaka belanja dalam RM10,000 setaun kena lun, nyaga kerita nya kelimpah ari mayar endur paking kerita.
“Pemisi teknologi baru bansa tu ba GRAB nyimat kos kita laban kita enda ibuh mayar endur paking kerita sereta servis bukai,” ku iya.
Ba atur pengawa nya mega, Lam dalam jaku iya madahka, GRAB diatu ngempuruka urung beribu driba GRAB di Bandaraya Kuching.
Palan alai kerita GRAB ngetu di iCom nya, nyadi kerejasama entara servis ‘ e- hailing’ kerita GRAB sereta Opis Pengatur ICOM Square.
Bepelasarka kerejasama nya, iCOM Square berengkah ari kemari, meri 1,000 iti kod promo ngagai mensia mayuh ke bisi ngelawa iCOM Square.
“Kod promo nya, “GRABICOM” ke ulih dikena ninting hari, ari pukul 8 pagi ngagai 8 malam dalam kandang sebulan tu.
“Pengguna GRAB ke ngelawa iCOM Square, deka nerima diskaun RM5 ke tiap pejalai sida iya,” ku iya.