Kontinjen Polis Sarikei udah besedia napi PRU14 bejalai enggau mujur
SARIKEI : Kontinjen Polis Pelilih Menua Sarikei deka ngena semua pemisi raban polis di pelilih menua nya napi Pengawa Bepilih Besai ( PRU14) ti dipelabaka deka diatur enda lama agi.
Ketuai Polis Pelilih Menua Sarikei, Pemangku Supt. Awang Arfian Awang Bujang madahka di pelilih menua nya, PRU14 deka mungkur sitak Sarikei (iya nya kerusi nengeri Repok enggau Meradong), sereta Tanjung Manis (kerusi nengeri iya nya Kuala Rajang enggau Semop).
“Raban polis di Sarikei deka ngena naka pemisi sida iya di pelilih menua tu, ke semua 224 iku, kena beratika proses PRU14 bejalai enggau mujur, berengkah ari hari ngantung nama datai ngagai maya pemutus undi deka dibantaika,” ku Awang Arfian madah ngagai bala pengarang berita ke bisi betemu enggau iya, di opis iya ditu, kemari.
Iya nandu baru madahka kontingen polis Pelilih Menua Sarikei deka nyaga proses pengawa bepilih di Repok tauka Pelilih Menua Sarikei, enggau Kuala Rajang tauka sitak Tanjung Manis District, ku iya.
“Kami semua udah besedia napi pengawa bepilih besai tu,” ku iya, lalu nandu baru madahka seraban pegawai ari Bukit Aman pan udah meresa tikas penyendia raban polis di pelilih menua nya.
Ketuai Polis Pelilih Menua Sarikei nya mega minta raban pengarang berita di pelilih menua nya, meri kerejasama sida iya begulai enggau raban polis kelebih agi ngemunaska pengawa salah di pelilih menua nya.
Sama bisi enggau ngulu randau enggau pengarang berita nya, Sapit Ketuai Polis Pelilih Menua Sarikei, DSP Zamry Ali.