Peranak Taman Tay Thian Chiong Kapit minta bantu Jamit mutarka penanggul tanah tusur
KAPIT: Kaban Kunsil Nengeri (ADUN) Bukit Goram Jefferson Jamit Unyat, siku pengari rayat ti ngembuan penyiru ngabas gaya pengempu rumah dituntung penusah tebing sungai tusur enggau tekerap di Taman Tay Thian Chiong, Jalai Padang Lumba, ditu.
Bedau lama udah, Jamit bisi ngabas sereta meresa kediri empu gaya tanah tusur ti nyadi ba struktur rumah nya apin lama ke udah. Iya disempulang bala ketuai opis enggau ketuai komuniti.
Sida ti ngempu rumah Teo Kim Yiew, toing Huong Ming, Teo Kim Moi, Tiong Nai Tung, Teo Tien Chai, Toing Mee Wu, Christina Tiong Siaw Ling enggau Chu Shieh Shik ngapil ngagai Jamit ngambi ngaga dinding penekat ngambika tanah badu tusur ba endur penusah nya.
Ngarika sida ti tasah nya Christina Tiong Siaw Ling, nusui penusah ke nyadi seraya ngapil ngagai Jamit ngambika mantu sida mutarka penanggul tanah tusur ngambika ngaga dinding penekat sereta mega parit besai nentuka alur ai terus ngagai Sungai Ulu Selirik ari lilih ngagai lebak.
Sungai Ulu Selirik di tanah belakang Taman Tay Thian Chiong, di Jalai Padang Lumba ditu bisi tekerap lalu tau ngeruga pengelikun abis nadai tiga buah rumah ngujungka sida ke diau dia berasai irau.
Bala sida endang begunaka bantu dikena mutarka penanggul tanah tusur nya.
Sida ngapil ngagai perintah ngambika meresa sereta bejalaika pengawa ti patut dikena nagang tanah majak tusur.
Berindik ari sebana nya, The Borneo Post udah meresa endur ti disebut beratika pun penusah tanah tusur nyadi ari parit besai ti rusak laban kelalu mayuh nakung ai lalu ngelimpah ke tebing, ngelemika struktur tanah. Nya alai, maya ujan bangat, tanah tekerap.
Parit besai ti rusak nakung ai ari beratus rumah di Taman Tay Thian Chiong, Taman Chong Seng enggau Taman Airport ditu. Peneras ai nyadi pun penusah tanah tusur nyadi.
Pekara patut diperati diatu pengelikun sida ke diau dia, kelebih agi tiga pintu bilik ti besemak enggau endur tanah tekerap. Sida tu iya nya Tiong Huong Ming, Chu Sing Mien enggau Tiong Nai Tung, ti ngapil bantu ari perintah.