Ulah ti bebasaka jalai pengarap sereta gaya pengidup komuniti bukai deka nentuka penegap penyerakup di nengeri tu

SRI AMAN: Menteri Muda Pengelantang Komuniti Sarawak Datuk Francis Harden Hollis meransang rayat ngambika enda bemain pekara ti bekaul enggau bansa, tang patut bebasa sereta meretika budaya enggau jalai pengarap komuniti bukai ti ulih pulaika penegap penyerakup nengeri tu.

Nitih ku iya, ngembuan ulah bebasaka pengarap enggau adat asal komuniti bukai, tentu nengeri enggau menua kitai tu deka seruran lantang ari penyarut.

“Pekara ti dikearapka kitai, isu ti ngaul bansa enda patut disebut laban nya tau ngeruga pengelikun enggau pengelantang menua kitai tu,” ku iya.

Iya ke mega Kaban Kunsil Nengeri (ADUN) Simanggang mansutka jaku nya lebuh bejaku ba Pengawa Ngangkat Sumpah Komiti Parti Sa’ati Rayat Sarawak (SUPP) Pampang Pantu ungkup penggal 2018-2020 enggau Pengerami Makai Lemai Taun Baru China diatur SUPP Pampang Pantu di Balai Sekula Primari Bansa China (SJKC) Chung Hua di Pantu, semak ditu, malam kemari.

Ku iya nambah, nengeri Sarawak udah megai perintah kediri lebih 50 taun begempung numbuhka Malaysia, nya alai penyerakup antara pupu bansa patut dijaga sereta ditan lalu penyerakup ke bisi diatu udah chukup teguh dataika dipuji di tikas dunya.

“Semua tu asil pengawa bala

Pekara ti dikearapka kitai, isu ti ngaul bansa enda patut disebut laban nya tau ngeruga pengelikun enggau pengelantang menua kitai tu. Datuk Francis Harden Hollis Menteri Muda Pengelantang Komuniti Sarawak

ketuai menua kitai ti seruran ngiga jalai pemadu manah nempa rayat ngambi ngetanka penyerakup,” ku iya madah nyemetak.

Berebak enggau nya, iya mega ngarapka isu bekaul pekara jalai pengarap patut diputar memanah ngambika enda ngasuh charut, nyadi laya sereta bisi ati nyima enggau pangan diri.

Sama bisi datai Sekretari Peribit Sapit Menteri Dalam Menua Whelthon Lumpoi, Temenggong Kueh Aik Seng, Penghulu Lee Thong Seng sereta bala bukai.

Harden udah nya nyuaka geran perintah penyampau RM10,000 ngagai Kaunsil Pengatur Pengawa SJK Chung Hua Pantu enggau Bangkong dikena bejalaika aktiviti ninting taun sida.

Pia mega, geran perintah bela penyampau RM5,000 enggau RM3,000 bisi disua ngagai Komiti Pemansang Enggau Pengelikun Genturung Pendiau (JKKK) Rumah Rayang Ringkai, Pantu.

SUPP Pampang Pantu mega bisi nyuaka pemeri penyampau RM2,850 ngagai SJK Chung Hua, Pantu asil ari untung ngatur pengerami nya.

TERIMA MIH: Harden (tengah) ngarika SUPP Pampang Pantu nyuaka replika chek ngagai pengari pengajar SJK Chung Hua Pantu (kiba) seraya dikemata bala kaban SUPP ke bukai, semak ditu, malam kemari.