Kabinet nengeri udah ngemendarka rang undang -undang dikena ngubah Ordinan Ngelumbung Minyak

KUCHING: Sarawak deka ngambi baru kuasa nyaga sereta ngemata penuh bekaul projek pengemun enggau pengerembai industri minyak enggau gis di Sarawak lebuh manggai bulan Julai taun tu.

Kepala Menteri Datuk Patinggi Abang Johari Tun Openg madah, kabinet nengeri udah ngemendarka rang undang- undang dikena ngubah Ordinan Ngelumbung Minyak dikena ngemanahka ke diungkup enggau nyendiaka chara neritka atur ti lebih meruan.

“Rang undang- undang deka dibantaika ba Kunsil Nengeri (DUN) bulan Julai ila.

“Reti nya lebuh manggai Julai taun tu, Sarawak deka neritka atur sereta nyaga lalu ngemata penuh bekaul enggau semua pekara projek pengemun enggau pengerembai minyak enggau gis di Sarawak,” ku iya.

Iya mansutka pekara nya lebuh bejadika PETROS ti mega bisi digulu Sapit Kepala Menteri Datuk Amar Douglas Uggah Embas, Chairman PETROS Tan Sri Datuk Hamid Bugo sereta menteri kabainet ke bukai, malam ensanus.

Abang Johari nerangka Sarawak diatu deka ngena hak enggau undang-undang, iya nya semua sida enggau kompeni ti bekaul dalam industri minyak enggau gis di Sarawak patut bisi lisin, permit, suwa enggau pemendar diguna ari baruh sekalika Ordinan Ngelum- bung Sarawak tauka Ordinan Nyadung Gis.

“Sida diguna kena nyaga lalu ngatur operasyen enggau aktiviti sida awakka nitihka semua undang-undang nengeri nyengkaum bekaul enggau nguna sereta ngempu tanah,” ku iya.

Iya taja pia, meri jamin pengawa neritka undangundang nya enda ngeruga pemesai guna tauka puku ti diperanak Petronas sereta kompeni bukai.

Nya nyengkaum sida ti udah ngemeranka industri minyak enggau gis di Sarawak sekalika dalam industri projek pengemun enggau penger- embai industri.

Tang ku Abang Johari, aktiviti dagang enggau operasyen sida patut disebaka enggau undang-undang sereta atur nengeri tu.

Ku iya, retia iya, pengudah bulan Julai semua kompeni nyengkaum Petronas ke deka beoperasyen di nengeri tu patut bisi lisin nyerungkai pemansut minyak enggau gis ari perintah nengeri.

Sebedau tu, kompeni minyak beoperasiyen ari baruh Akta Pemansang Petroleum (PDA) reti nya, sida semina ngulihka pemendar ari perintah besai.

Kenyau ari taun 1975, Gis Asal Lela ari Sarawak udah dieksport PETRONAS lalu asil ke diulih nya udah mayuh mai pemanah ngagai ekonomi menua enggau pemansang Perintah Besai.

“Nengah pengawa bejalaika hak konstitusyen kitai di Sarawak, perintah nengeri tetapika juluk rayat Sarawak iya nya asil tambah ari minyak enggau gis kedeka ngenyampatka agi pemansang industri.

“Kelimpah ngemajuka ekonomi ti nyadika Malaysia tejapaika ekonomi bepenatai pemisi tinggi lebuh manggai taun 2030,” ku iya.

Reti nya lebuh manggai Julai taun tu, Sarawak deka neritka atur sereta nyaga lalu ngemata penuh bekaul enggau semua pekara projek pengemun enggau pengerembai minyak enggau gis di Sarawak. Datuk Patinggi Abang Johari Tun Openg Kepala Menteri Sarawak