Saau Kakok dichiri nyadi CEO PETROS
KUCHING: Ex- Mandal Presiden projek khas ungkup Asia ba kompeni minyak ti bepalan di Amerika Syarikat, Saau Kakok dichirika nyadi Ketua Pemesai Eksekutif (CEO) Petroleum Sarawak Berhad (PETROS).
Saau, 64 taun bansa Bidayuh bisi mayuh peneleba dalam aktiviti nyerungkai projek pengemun industri minyak enggau gis di serata dunya.
Kepala Menteri Datuk Patinggi Abang Johari Tun Openg ti mantaika pekara nya madahka, PETROS amat benasit manah laban bisi siiku orang ti bepeneleba sereta bisi penau enggau pemandai baka Saau.
“Aku enggau gaga ati meri kelala iya nya Saau Kakok enggau rasmi nyadi CEO baru PETROS.
“Iya (Saau) ngabiska urung 40 taun pengawa iya dalam industri minyak enggau gis. Aku arap bendar Saau orang ke betul diberi tanggungpengawa ngiring PETROS mansang ke mua,” ku iya.
Iya mansutka pekara nya lebuh bejaku maya bejadika PETROS ti sama bisi digulu Sapit Kepala Menteri Datuk amar Douglas Uggah Embas, Chairman PETROS Tan Sri Datuk Amar Hamid Bugo sereta menteri kabinet ke bukai ditu, malam ensanus.
Abang Johari madahka iya arap bendar enggau peneleba Saau mega deka nambahka pemaik batang pengawa orang biak ti bisi penau enggau pemandai di Sarawak kelimpah PETROS nyadi platform pemadu manah endur gawa.
Ku iya baka ti kala dipadahka sebedau tu, rayat Sarawak bisi penau enggau pemandai ti chukup sereta peneleba enggau pengelandik dalam industri minyak enggau gis.
“Penyereta sida deka terus ditambahka enggau penyereta dalam kunterik sereta servis ti disediaka PETROS.
“Perintah nengeri deka ngeluarka garis lalau ngagai PETROS dikena nentuka penyereta ke mayuh agi sereta besai agi reti ari kompeni Sarawak dalam sektor tu,” ku iya.
Ngenang silik pekara bekaul enggau penuduk dalam PETROS, ujung bulan nyin tadi ku iya, iya udah nyiri Kaunsil Direktor keterubah PETROS lalu pun taun tu mega udah nyiri Datin Josephine Hilary Dom nyadi kaban tambah kaunsil nya.
Entara kaban kaunsil direktor PETROS ke bukai iya nya Ketuai Pemesai Eksekutif Bintulu Port Holdings, Datuk Mohammad Medan Abdullah, Ketua Pegawai Eksekutif Sarawak Energy Berhad, Sharbini Suhaili, Ex- Direktor Urusan Shell Gas Malaysia, Heng Hock Cheng enggau Direktor Opis Kereja Raya Sarawak, Datu Zuraimi Sabki.
PETROS deka nguluka Sarawak dalam sektor minyak enggau gis ti dianggap nyadi pemerat strategik ke objektif pemansang sosioekonomi di serata nengeri tu.
Abang Johari madah, PETROS deka diberi hak ngelumbung minyak enggau gis asal di nengeri tu sereta nyadi pengemeran ke pemadu beguna dalam projek pengemun industri minyak enggau gis.
“Dikena ngepun, lisin nya dipansutka sereta deka diberi ngagai PETROS maya pengerami tu.
“Beratika tanggungpengawa ti besai PETROS ba sektor minyak enggau gis Sarawak, aku arap bendar, lalu amat beguna ba PETROS nyadi kering, ngasi enggau sikar bejalaika tanggungpengawa ti udah dilempai ba sida,” ku iya.