Rayat S’wak patut meri terima kasih ngagai KM: Masing
KUCHING: Rayat nengeri tu patut beterima kasih ngagai Kepala Menteri ke udah mujur minta pulai baru hak enggau kuasa Sarawak dalam industri minyak enggau gis baka ti diungkupka dalam Konstitusyen ari baruh Rintai Nengeri dalam Tusun Kesemilan Konstitusyen Perintah Besai.
Sapit Kepala Menteri Tan Sri Datuk Amar James Jemut Masing madah, perintah besai ti udah setuju meri pulai baru hak enggau kuasa nya deka meri peluang ngagai Sarawak nguasa industri minyak enggau gis ke diri empu.
“Tu deka nyadika Sarawak nguasa penuh pemansut minyak enggau gis kediri empu.
“Bagi pekara ti bekaul dalam Konstitusyen Perintah Besai, ti udah lepas ngelama tu, diatu kitai ulih nyerungkai pemansut ke endang hak kitai.
“Kitai meseti meri terima kasih ngagai Kepala Menteri ke udah mujur ngulihka tu. Tu pekara ti manah taja pan laun ari ke nadai,” ku iya ti mega Presiden Parti Rakyat Sarawak (PRS) meri penerang nengah WhatsApp, kemari.
Berebak enggau tu Masing mega ngelalau sereta meransang semua nyengkaum parti penyakal ngambika begempung enggau perintah nengeri pasal pekara nya ngambika hak enggau kuasa ke ukai sengaja majak lenyau ulih diambi baru.
“Parti penyakal di Sarawak patut sama enggau kami nentuka hak Konstitusyen kitai nyadi nyata enda lama agi,” ku iya.
Malam ensanus, Kepala Menteri Datuk Patinggi Abang Johari Tun Openg lebuh bejadi Petroleum Sarawak Berhad (PETROS), madahka Menteri Besai Datuk Seri Najib Tun Razak udah setuju meri pulai baru hak enggau kuasa ti ukai sengaja majak lenyau betaun ke udah.
Berindik ari pekara nya, Abang Johari madahka Sarawak deka nyerungkai pemansut pengeraja asal minyak enggau gis ti nitih Konstitusyen ari baruh Rintai Negeri baka dalam Tusun Kesemilan Konstitusyen Perintah Besai.
“Malam tu (ensanus) aku deka madah ngagai rayat Sarawak baka ke udah disemaya aku di Sibu apin lama ke alai Yang Amat Berhormat Menteri Besai udah setuju meri pulai baru hak enggau kuasa ke udah ukai sengaja majak lenyau betaun ke udah.
“Nya alai, Sarawak deka nyerungkai pemansut pengeraja asal Minyak enggau Gis baka ti diungkupka dalam Konstitusyen ari baruh Rintai Negeri dalam Tusun Kesemilan Konstitusyen Perintah Besai ,” ku Abang Johari malam ensanus.