Mayuh orang indu deka chakah ngemansangka ruang bilik nengah pengawa betanam berindik ari pemisi teknologi
SARIKEI: Nengah pemansang teknologi, raban indu ulih chakah meri sukung ngemansangka ruang bilik sereta mega nempa modal mensia.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka pemisi teknologi udah ngemuntangka mayuh pengawa enti dibanding ngaga ngena chara tradisional tauka chara lama.
“Ambika chunto, teknologi udah ngasuh raban indu ngereja pengawa sida ke lelaki baka bekebun laban nya enda begunaka sida gawa di baruh terit mata panas ngereja pengawa bumai tauka besayur,” ku Len.
Chunto nya, sida ke indu ulih ngena chara fertigasyen nanam sayur enggau buah laban nadai penusah, ku iya, seraya nambah, teknologi baru ukai semina ngemuntangka pengawa bumai tang mega nambahka asil.
Fertigasyen mega ngasuh sida ulih ngena pemansut enggau memanah, kelebih agi tanah ti dipeda mar diulih ngagai sida ke diau di kandang mengeri, ku Len dalam jaku iya dibacha Pemesai Jasa Sarikei, Ahmat Adai, ti ngarika iya bejadika pengawa ngelancharka konvensyen Kelab Usahanita Berjaya Sarikei ( Kuick) di Palan Inovatif Sarikei (SIC) ditu, apin lama ke udah.
Taja pia, dikena nyapai pemansang ba pengawa dikereja sida, raban indu patut nyikap diri empu ngena penemu teknologi pemadah (IT), ku iya madah nyemetak, seraya nambah, sida patut nemu ngena komputer tauka landik ngena aplikasyen telefon pintar ngambika sida ulih ngena memanah awak ti sebagi ari iya nengah jalai internet taika teknologi digital kemaya hari.
“Baka kitai mansang ngagai ekonomi digital tauka e-dagang, penemu IT ukai semina ditatak ngagai raban nembiak lalu telefon pintar ukai agi diperati barang ti berega aja, tang perengka guna ungkup semua renggat umur,” ku Len nandu.
Iya pechaya konvensyen udah nyediaka pedagang indu menua tu enggau pelasar dikena ngiri penemu baru sereta ngempung pengawa ti patut nentuka sida nyapai pemujur dudi hari.
Len muji Amanah Ikhtiar Malaysia (AIM) pampang Sarikei udah ngatur konvensyen pulaika pemaik bala kaban Kuick ti nyadi pelanggan sida.
Antara bala bisi datai iya nya Menijar AIM Wilayah Tengah, Haryati Dahari.
Ambika chunto, teknologi udah ngasuh raban indu ngereja pengawa sida ke lelaki baka bekebun laban nya enda begunaka sida gawa di baruh terit mata panas bumai tauka besayur. Datu Len Talif Salleh Menteri Muda Perambu Mengeri, Pengatur Tanah enggau Rampa Menua