Raban nembiak patut mekuh ngagai subjek Sains enggau Matematik
KAPIT: Kaban Kunsil Nengeri ( ADUN) Bukit Goram Jefferson Jamit Unyat ngelalau bala nembiak ditu serius agi ba subjek Sains enggau Matematik dikena nyapai pelajar tinggi dalam bidang pengerai enggau pelajar perubat.
“Aku ngelalau nembiak sekula sekondari ditu serius agi belajarka subjek Sains enggau Matematik ngambika ulih nampung pelajar tinggi dalam bidang pengerai enggau pelajar perubat.
“Nyadi pengari rayat kita, aku deka meda mayuh agi raban nembiak kitai nyadi raban profesional dalam bidang pengerai baka pengawa indu misi, ba farmasi enggau pemesai perubat. Tu kereja ti chukup dipebasa, nerenakka pengawa ngintu pengerai nga- gai mensia mayuh,” ku iya.
Nya alai iya meransang apai indai matak bala anak sida rindu belajarka subjek Sains enggau Matematik. Pengudah kita netapka pemerat ba pelajar menyana, iya pechaya apai indai nyadi pengajar keterubah ngagai bala anak sereta ngelimpangka mayuh agi awak begulai enggau sida ngambi nentuka bala anak rindu belajar.
“Pekara pemadu beguna ti ngasuh subjek Sains enggau Matematik patut dikemerat laban nya nentuka penyulut pengidup dudi hari. Ambika chunto, nembiak sekula aliran sains maya nampung pelajar sida bisi skop chukup besai dikena milih baka perubat, orang gawa di farmasi, nyadi indu misi dalam bidang ngintu pengerai, injinir, teknikal enggau gawa ba bidang kimia, kualiti servei, gawa nyadi akauntan sereta ke bukai. Semua fakulti tu begunaka pelajar Sains enggau Matematik ngambika diterima masuk,” ku Jamit lebuh iya bejadika Pengawa Ngelanchar Program Pengerai Fakulti Perubat Dan Sains Pengerai, UNIMAS di Dewan Kejora, SMK Kapit 2 kena ngalihari Hari Dua, 6 March tu tadi.
“Kapit agi suntuk raban profesional. Aku deka meda dudi hari mayuh nembiak kitai nyadi raban profesional ngambika dianjung gawa ditu. Dunya kemaya hari dipenggi rebak aku. Dunya dudi hari dipenggai raban nembiak diatu. Kitai patut bisi penau ba penemu enggau pengelandik ngagai raban nembiak kemaya hari ti deka nyadi ketuai dudi hari, nampung pengawa sereta bekunsika penemu ngemansangka Kapit jemah,” ku iya.
Jamit muji Fakulti Perubat Dan Sains Pengerai, UNIMAS ti udah mujur ngatur program outreach di SMK Kapit 2 di baruh pengawa ngintu genap 25 taun Jerayawara UNIMAS.
Ku iya nerang, batang tuju deka ngerembaika penerang ti beguna pasal pelajar di Fakulti Perubat Dan Sains Pengerai di UNIMAS, pelajar tikas degree ungkup Nursing enggau Perubat.
Ku iya, nengah pengawa bejalai meri penerang interaktif ‘hands on practical skills in medicine’ nengah pengawa mandang enggau bangsal dikena ngelakuka program akademik ti bisi disediaka UNIMAS.
Seraya Naib Canselor Professor Datuk Dr Mohamad Kadim Suaidi dalam jaku dipansutka iya nerangka siti ari Program Outreach Komuniti ari Fakulti Perubat Dan Sains Pengerai, UNIMAS.
Ku iya, dulu agi udah diatur di Kanowit lalu diatu di SMK Kapit, udah nya SMK Selirik sebedau mulaika diri ngagai Kuching.
Iya madahka program nya digulu nembiak Pom Empat, Pom Lima enggau Pom Enam ari SMK Kapit 2 deka nemu silik agi penerang pasal degree ‘Nursing’ enggau Perubat. Empat taun ungkup degree ‘nursing’ lalu lima taun timpuh belajarka Pelajar Perubat (Pemesai Perubat).
Pinta minimum ungkup degree ‘nursing’ abis nadai pointer manggai 3.0 ngagai 3.5 seraya degre perubat meseti 4.0 pointer.
Professor Datuk Dr Mohamad Kadim Suaidi madahka UNIMAS ngintu pengerami genap taun iya ke-25. Iya udah ditumbuh dalam taun 1992. Bisi 17,000 iku pelajar bedau graduet. UNIMAS nyediaka 41 bengkah kus pelajar sarjana muda, 40 ungkup Master lalu 29 ungkup PHD.
“UNIMAS siti ari Fakulti Perubat pemadu manah di palan pelajar tinggi perintah kelimpah ari Universiti Malaya (UM), University Sains Malaysia ( USM), University Kebangsaan Malaysia (UKM),” ku Professor Datuk Dr Mohamad Kadim Suaidi.
Sama bisi bejaku rambau program sehari nya, Prinsipal SMK Kapit 2, Robin Sabai.
Professor Dr Haji Ahmad Hata Rasit –Dekan Fakulti Perubat Enggau Sains Pengerai, Professor Dr Kopli Bujang – Sapit Naib Canselor Pemansik Enggau Inovasyen Professor Madya Dr Ramlah Zainudin – Dekan Pusat Pengajian Pra Universiti, Robin Sabai - Principal SMK Kapit 2, Stanley Bain – Pemesai Opis Pelajar Pelilih Kapit.
Kelimpah ari licha peransang, isi program mega bisi bangsal mandangka CPR – ‘Cardiopulmonary Resuscitation’, ubat, penyakit bekaul enggau tungkul sengayuh, nginsap enggau penyakit, sereta pekara bukai.