Tr Bagus enggau Tr Jimbai nyukung Subeng nyadi chalun BN di Parlimen Saratok
KUCHING: Rayat di Saratok begunaka chalun ke ulih megai tanggunpengawa nyadi pengari rayat sereta ulih ngatur menua nya.
Berindik ari pekara nya, Tuai Rumah (Tr) Bagus, Simpang Empat Plasu, Kabong madahka Subeng Mula iya nya siku orang ke patut nyadi chalun lalu nyadi pengari rayat.
“Rayat Saratok endang begunaka siku ketuai tauka pemesai ti regas sereta bisi ngembuan runding enggau ulah ke positif.
“Lalu Subeng iya nya siku orang ti ulih megai tanggungpengawa nyadi pengari rayat sereta ulih ngiring Saratok enggau manah,” ku Tr Bagus.
Tr. Bagus mansutka penemu nya lebuh ti nyimpul randau nyerumba ‘Program Santai’ ke diatur ba rumah panjai ke diiring iya, iya nya Simpang Empat, Plassu, di Kabong kena 5 Mac tu tadi.
Subeng Mula ari Parti Demokratik Progresif (PDP) iya nya siku orang ti ngelakuka diri ba Parlimen Saratok , ti endang asal ari Kaki Wong Saratok ke mayuh peneleba ti berengkah gawa di Bintulu dalam taun 1985 sereta bisi mangku pengawa dalam Petronas sereta bepelajar tinggi.
Subeng bisi juluk deka ngamatka aspirasyen rayat di Saratok, beterima kasih ngagai ketuai renggat atas parti nya ti arapka iya terus bejalai dikena nyapai juluk nyadi pemesai ba menua nya, ke lalu deka nempa Saratok maju nyingkang ke mua.
Dua hari sebedau nya, Subeng mega bisi betemu enggau peranak di Sebubu, Roban ba Rumah Jimbai, Sebubu Lichok di Roban.
Program Santai ba rumah nya mega nerima sambut enggau sukung ti manah ari rayat rumah nya ke diiring Tr Jimbai.
“Kami gagit ati sereta se- ruran nganti maya Subeng dipilih nyadi chalun.
“Kami meri sukung ti nadai bebagi ngagai Subeng enti nyadi pengari rayat di Saratok,” ku Tr. Jimbai.
Parlimen Saratok diatu disandang Tan Sri William Mawan Ikom pengudah ti menang ngarika Barisan Nasional ba Pengawa Bepilih Besai Ke-13 (PRU13).