Program renggat kedua RS1 di Bawang Assan udah berengkah kemari

SIBU: Renggat kedua pengawa ngagih kanopi, mija lipat enggau bangku plastik ari Tim Pelin Pemansang SIbu 1 (RS1) ngagai tetiap rumah panjai ba sitak Kunsil Nengeri ( DUN) Bawang Assan udah berengkah lemai kemari.

Renggat kedua tu ngaul pengawa ngagih 85 kanopi, 299 mija lipat enggau 2,915 bangku plastik. Ba renggat keterubah, bisi 81 kanopi, 100 mija lipat udah diberi ngagai rumah panjai kena bulan Disember taun nyin kemari.

Pengerami nyuaka perengka nya ba renggat kedua udah digaga Kaban Kunsil Nengeri (ADUN) Bawang Assan ke mega Menteri Pekara Wang sereta Menteri Dagang Antarabansa enggau E-Dagang, Dato Sri Wong Soon Koh.

Pengerami simbolik pengawa nyuaka kereban ba renggat kedua nya udah dipejalai ba Rumah Catherine Tamoh, Sungai Aup, lemai kemari.

Sama bisi datai iya nya Chairman RS1 ke mega Chairman Kaunsil Servis Komuniti Parti Rakyat Bersatu (UPP) Sibu Dato Andrew Wong, Mandal iya Andrew Shiling sereta kaban RS1 ke bukai.

Nitih ku Andrew Wong, RS1 udah ngena belanja urung RM0.5 juta dikena meli 166 kanopi, 399 mija lipat enggau 2,915 bangku plastik.

Semua kanopi, mija lipat sereta bangku plastik nya deka diagih ngagai 114 buah rumah panjai enggau genturung pendiau ba DUN Bawang Assan.

Ku iya, semua kanopi, mija lipat enggau bangku plastik nya datai ari Kuala Lumpur lalu bisi kualiti ti manah.

“Kitai meri semua nya ukai ketegal pengawa bepilih ti deka datai tauka deka ngulihka undi ari semua.

“Tang pemeri tu iya nya tanggungpengawa perintah ke diatu iya nya Barisan Nasional (BN),” ku chalun ti nyangka deka ngarika UPP ba Parlimen Sibu.