Kelas Kluster meransang pengelandik teknologi digital nembiak sekula
KUCHING: Opis Menteri Pelajar, Sains enggau Pansik Teknologi Sarawak dilalau meri ungkup kena mantu ngemanahka agi pemisi makmal komputer di sekula di menua tu.
Presiden Serakup Pengajar Bumiputera Sarawak (KGBS) Ahmad Malie madah,pengawa ngemanahka agi perengkaguna makmal komputer nya ulih digaga ari sukut perengkaguna nyengkaum pemisi internet di sekula.
“Nengah chara nya, pemerat opis menteri deka muka kelas kluster baru ngena sistem teknologi digital di tetiap Opis Pelajar Pelilih Menua di serata menua Sarawak ulih dikeamatka,” ku iya madah lebuh dikerandau ulih Utusan Borneo kemari.
Iya madah serakup nya betatika pemerat jaku Opis Menteri Pelajar, Sains enggau Pansik Teknologi, Dato Sri Michael Manyin Jawong alai KGBS mega ngelalau pemesai sekula ulih ngaga pengawa sida iya bepelasarka teknologi.
Pengawa ngemanahka agi perengkaguna makmal komputer nya ulih digaga ari sukut perengkaguna nyengkaum pemisi internet di sekula. Ahmad Malie Presiden Serakup Pengajar Bumiputera Sarawak (KGBS)
Atur tu ku iya, deka meransang pengajar berati sereta nandu baru pekara bekait enggau ‘Elemen Merentas Kurikulum dalam Teknologi Maklumat Komunikasi (EMK TMK)’ dalam proses ngajar sereta belajar.
“Tu kena meransang literasi tauka pengelandik teknologi digital ba nembiak sekula kelimpah ari ngelatih modal mensia ari sukut teknologi digital ke beguna di menua tu jemah ila,” ku iya.
Chairman Kongres Kesatuan Pekerja- pekerja Dalam Perkhidmatan Awam ( CUEPACS) Sarawak taja pia madahka KGBS nerima sadang nya enggau manah sereta meri sukung penuh ngagai sadang Manyin nya,ke betatika tetiap buah sekula ngaga kelas kluster baru alai ngaga pengawa ke ulih meransang literasi (pengelandik) teknologi digital ba nembiak sekula.
Lalau nya mega dipeda ngipak pemerat perintah menua baruh pegai Kepala Menteri Datuk Patinggi Abang Johari Tun Openg ke bebendar ngangkatka era teknologi digital, kelimpah ari pemansang revolusi industri 4.0.
Bedau lama tu tadi, ba siti atur pengawa, nutup ‘Ekspo Reka Cipta,Inovasi dan Reka Bentuk ( SIIDEX)’, Manyin madah opis menteri sida iya udah meri atur, iya nya Opis Pelajar Menua (JPN) Sarawak patut ngaga pemansang nya, ngambika menua tu ngembuan nembiak ke bepengelandik dalam pekara teknologi tauka digital betikas entarabansa.
“Ba penemu kami, pemisi kelas bansa tu, Sarawak ulih ngelatih bala nembiak rebak baru ke bepenemu, besemekih sereta kreatif.