Mayuh agi minta nyadi raban TLDM manah agi kelebih agi ari pupu bansa China enggau India

KUCHING: Sedadu Tasik Diraja Malaysia ( TLDM) nadai netapka sebarang kuota ngambi anak Sarawak masuk TUDM, tang meransang mayuh agi raban TLDM baru ke ukai ari bansa Bumiputera.

Panglima Tentera Laut Diraja Malaysia (TLDM), Laksamana Tan Sri Ahmad Kamarulzaman Ahmad Badarudin madahka nadai kuota khas ditetapka dalam pengawa ngambi raban TLDM baru.

Ku iya, pemadah ke nyebut bisi kuota khas ngambi anak Sarawak masuk nyadi raban TLDM, ukai penerang ke betul, lalu ngenad- aika penerang ke madahka kuota ngambi anak Sarawak ke ditetapka kurang ari 10 persin.

“Dalam ATM (Angkatan Tentera Malaysia) kami nadai netapka kouta dalam pengawa ngambi raban baru kelebih agi dalam TLDM.

“Enti nitih, nadai pekara netapka kouta ngambi anak Sarawak dalam TLDM, pemadah nya enda betul,” ku Ahmad Kamarulzaman madah lebuh bejadika atur pengawa Meri Midul Kepasa Veteran TLDM enggau sesi Admiral On Deck di Komplek Kunsil Nengeri Lama ditu, kemari.

Ku iya, TLDM meransang mayuh agi masuk nyadi raban pengelikun nya, kelebih agi sida ke ukai Bumiputera.

“Enti orang ke minta nya bisi penau, sida iya deka diambi masuk enggau kami laban kami deka meda mayuh agi ke deka masuk nyadi raban TLDM kelebih agi ari pupu bansa China enggau India,” ku iya.

Sebedau nya, Ahmad Kamarulzaman bisi mega meri ‘Pingat Jasa Malaysia’ (PJM) ngagai urung 24 iku penerima veteran TLDM.

Atur pengawa meri midul nya ku iya, laban beterima kasih ke pengawa veteran TLDM ke udah gawa ke menua tu.