TLDM minta palan penyangkai di Bintulu digaga enggau jampat

KUCHING: Panglima Sedadu Tasik Diraja Malaysia (TLDM), Laksamana Tan Sri Ahmad Kamarulzaman Ahmad Badarudin ngarapka Perintah ulih ngenyampatka proses ngemansangka Markas Wilayah 4 TLDM di pelilih menua Bintulu.

Iya madah pemisi palan penyangkai baru nya ila, ulih alai TLDM nyimpan perengka guna sida iya (aset) dalam pengawa ngangkat sereta nyaga pengelikun sitak tasik sereta garis menua tu.

TLDM ku iya, sigi udah nganjung Tim Nukleus di Bintulu baruh pegai Opis Penguasa Armada Timur.

Berindik ari nya, iya madah ari sepiak Opis Menteri Ngetan Menua ku iya, udah minta proses pemansang nya digaga enggau jampat.

“Kami ngasaika Sarawak begunaka pemerat TLDM ditu, lalu pemisi pemansang Markas Wilayah 4 tu, kami ulih nganjung mayuh agi kapal bepalan ditu ( Bintulu).

“Naka kediatu, kami (TLDM) agi numpang perengka guna di Palan Penyangkai Bintulu,” ku iya.

Iya madah munyi nya lebuh dikerandau pengudah bejadika atur pengawa Meri Midul Jasa Malaysia enggau Program Admiral on Deck di Komplek Kunsil Nengeri Lama (DUN) Sarawak ditu, kemari.

Lebuh nerang pasal pemansang markas nya enggau silik agi, Ahmad Kamarulzaman madah proses pemansang markas nya diatu dalam renggat ngiga endur ke ngipak alai markas nya.

Ke batang ku iya, pemisi markas TLDM ke bela di Sabah enggau Sarawak dalam pengawa ngangkatka sukut pengelikun maritim di Tasik China Selatan.

“Mayuh ari markas kami bisi di Sabah, iya nya di Sepanggar, Sandakan, Semporna enggau Tawau, nya kebuah kami begunaka markas baru dikemansangka di Sarawak,” ku iya.