Wang Turu Pelajar Penan meri peransang ngagai anak Penan betatika pemerat pelajar
KUCHING: Wang Turu Pelajar Penan bisi mandangka pemujur palan nya mantu bala nembiak di sitak menua pesisir ngulihka pelajar ke manah agi.
Wang Turu Pelajar Penan ke ditumbuhka dalam taun 2015 lalu bepalan ba Belaga nya, diatu dalam taun ketiga mandangka pemujur mantu bala nembiak di sitak nya, jauh manah agi ari taun ke udah.
Wang Turu nya ti dipungkal ari pemujur kerejasama di entara Sarawak Energy Berhad (SEB) enggau Tabung Amanah Bakun (TAB), digaga kena nyukung sereta mantu bala nembiak Penan sereta nembiak bukai di Belaga nyengkaum komuniti pengentap Palan Hidroelektrik Murum (HEP).
Komiti Tabung Pelajar ke bechairmanka Kaban Kunsil Nengeri ( ADUN) Belaga Datuk Liwan Lagang begulai enggau wakil rayat Murum, Kennedy Chukpai Ugon ke mangku pengawa nyadi mandal chairman, sebedau tu bisi baum di Bintulu enggau SEB lalu besetuju ngemansangka pemujur 2017 nya.
Ke taun tu, program ke digaga nengah langgur 2018 deka beratika pekara bekait enggau pemanah penuduk akademik sereta peluang pengawa latih ke bala nembiak di sitak nya, bepelasarka pemujur ti udah dipandangka ulih nembiak ari komuniti program tu taun siti nyin tadi.
Ba aum nya, entara pemerat bukai beratika agenda ke taun 2018, deka madah ngagai komiti pasal pemujur akademik nembiak sereta pemujur pengawa latih ti udah dipejalaika.
SEB digulu ulih Penulung Menijer Besai pampang Tanggungpengawa Rama Korporat (CSR), Jiwari Abdullah, enggau menijer Kanan (Pemansang Komuniti enggau Penanam Pukuk Rama), Joanne Tan.
Kelimpah ari Liwan eng- gau Chukpai, pemesai bukai nyengkaum chairman Komiti Pemansang Penan Murum (MPDC) Labang Paneh, pengari ari Opis Pelajar Belaga Nora Igang, Ketuai Sekula ari SMK Bakun, Henry Usat Bit, ketuai SK Metalun, Majid Aja, Anu Garing ari SK Tegulang, pengari Unit Perencanaan Menua, Awi Abang, enggau pengari Opis Pelajar Belaga, Zain Rocky.
Taun siti nyin tadi beratika pemayuh nembiak Penan ke nurun sekula sereta penyampau nembiak ke di rejista di pengentap Murum, iya nya Sekula SK Tegulang enggau SK Metalun, teulihka pemujur pemutus akademik ke manah agi. “Pemanah penemu bansa tu udah nambah, laban komuniti udah nemu bakani ku pelajar tu berat ba anak sida iya. “Aku muji apai indai ketegal pemendar kita laban betatika pemujur anak kitai jemah ila,” ku Liwan.
Ba komuniti, ke besemak enggau SK Tegulang enggau SK Metalun, tabung nya udah ngaga perengka guna endur diau ke nembiak primeri, ngambika enda jauh ari apai indai sida iya.
Ba jaku Kennedy ba aum nya, iya madah dalam kandang berapa taun tu ke udah, semua piak udah bekerejasama lalu tu ke mai pemujur ngerijista bala nembiak nurun sekula bebanding enggau taun ke udah, ku iya.
Lalu baka nya mega enggau bala nembiak ke udah nembuka pekajar sida iya ba sekula sekondari, ke mujur dianjung ngagai palan pengelandik, alai sida iya ulih dilatih nitihka kus diambi sida iya.
Dua belas iku nembiak ke ke ngambi kus Teknologi Kimpalan (6G Advance dan 3G Plus), Mechatronic (Alat Pelabuhan), Chargeman Tahap 1 enggau dan Teknologi Maklumat, ari Palan Pengelandik Teknikal Sarawak (CENTEXS) mujur nembuka pelajar sida iya dalam bulan Disember tu tadi.
Siku ari sida tu, Ronny Lagu ari Long Malim di Murum, diberi gelar ‘ Nembiak ke Pengabis Nyulut’ dalam Teknologi Kimpalan, lalu bisi sekeda nya udah mujur bulih pengawa enggau kompeni ngaga rumah sereta fabrikasi di Kuching, Betong enggau Samalaju.
Ba Bekaren Asan, ari Long Malim di Murum, madahka Setipikit Advance 6G ke di ulih iya, muka peluang pengawa ke besai dalam pengelandik iya, kelebih agi diatu iya udah gawa enggau sebuah kompeni ngaga rumah di Bintulu. Ku Bekaren, iya gaga endar ati laban ukai semina udah bulih pengawa ke manah tang bisi gaji tetap ninting bulan.
“Pemerat aku kediatu, deka ngulihka mayuh agi peneleba ngambika bisi maya ila, aku ulih gawa ba industri minyak enggau gis ditu,” ku iya.
Kelimpah ari nya, semilan iku indu ari Long Wat di Murum diatu ke benung belajar dalam pekara, diploma profesional kus ngaga buok.
Ke semua ungkus ke dibayar ulih SEB entara bukai, betuju beratika komuniti ke kena bungkur projek ti dipejalaika ulih SEB nya bisi empas ke nguntungka sida iya.
Pun taun tu tadi, opis nya mega bisi meri bantu ninting taun kena besekula ngagai nembiak SK Metalun enggau SK Tegulang. SEB mega bisi nyendiaka perengka guna kena mai nembiak nurun ke sekula.
“Kami deka majakka pengawa CSR kami kena nyukung pemerat pelajar ukai semina ke nembiak sekula aja, tang nyengkaum meri pengawa latih pengelandik di Murum.
“Pemerat tu digaga ngambika mayuh agi bala nembiak ulih sama ngulu peluang tu baka nembiak bukai di mengeri,” ku Jiwari.