Proses mulaika kuasa dalam industri minyak enggau gis deka lanchar
KUCHING: Penganalisis Politik ti mega Pensyarah Kanan Opis Sosiabudaya Universiti Malaya Prof. Madya Dr. Awang Azman Awang Pawi, bepenemu proses meri pulai baru kuasa dalam industri minyak enggau gis ari Perintah Besai ngagai Sarawak bejalai enggau lanchar.
Ku iya, berita ti dibantaika Kepala Menteri Datuk Patinggi Abang Johari Tun Openg nyerumba bejadika Petroleum Sarawak Berhad ( PETROS ) malam ensanus, nya pekara ke chukup manah sereta meri peluang ngagai nengeri tu teulihka mayuh agi penatai pemisi ari industri nya.
Lebuh ke mantaika pekara nya Abang Johari madahka berindik ari pemujur nya, Sarawak deka nyerungkai pemansut pengeraja asal minyak enggau gis baka ti diungkupka dalam Konstitusyen ari baruh Rintai Nengeri dalam Tusun Kes- emilan Konstitusyen Perintah Besai.
“Tu ngayanka proses meri pulai baru kuasa ngagai Sarawak ari Perintah Besai bejalai enggau lanchar.
“Tu siti momentum ti amat setipak bendar ungkup Sarawak ke deka ngasaika mayuh agi penatai pemisi ari minyak, gis enggau pe- mansut pengeraja asal ke bukai pengudah berita nya dibantaika,” ku Azman lebuh dipinta Utusan Borneo meri penerang bekaul enggau pekara nya kemari.
Berebak enggau tu Azman bepenemu pemutus ke digaga Perintah Besai chukup beguna ngagai Barisan Nasional (BN) Sarawak kelebih agi ba pengawa bepilih ke deka datai.
Ku iya berindik ari Sarawak ke nyadi deposit tetap BN, nengeri tu bisi kuasa minta pekara ke endang diungkup ngagai nengeri.
“Nya alai, tu nyadi kebuah ti tegap isu pemesai guna Sarawak deka digaga nyadi menifesto BN Sarawak jemah ila.
“Sarawak begunaka mayuh agi peminta ke setipak enggau pemesai guna strategik nyadi deposit tetap BN. Ambika banding tambah ba royalti minyak patut bisi dikena melanja pemansang nengeri Sarawak ke majak ngerembai,” ku iya nengah aplikasyen WhatsApp.