Peranak Ulu Teru dipinta meri sukung ngagai perintah BN ungkup pemansang

MARUDI: Pengundi di sitak Ulu Teru dipinta seruran nyukung perintah Barisan Nasional (BN) sereta chalun parti nya maya Pengawa Bepilih Besai (PRU) laban semina perintah BN aja endang lurus ati mantu rayat ngelama tu.

Menteri Muda Kaunsil Kandang Menua, Datu Dr Penguang Manggil madah, perintah BN ukai baka penyakal ti semina datai maya musim bepilih aja, nadai nurun gawa ngagai renggat baruh mantu rayat.

Bejaku ngagai peranak ke bisi datai ngulu Program Pemesai Begulai Enggau Rayat di Rumah Henry Gomes, di Ulu Teru, Tinjar semak ditu, Penguang sekali agi ngelalau chalun BN nyauka nyengala bediri minta pilih di penuduk Parlimen Baram ila iya nya Anyi Ngau ari Parti Demokratik Progresif (PDP).

“Anyi iya nya penyandang penuduk ke bisi diatu lalu nyadi Kaban Parlimen (MP) Baram diatu sereta udah dipilih parti, PDP, bediri baru di penuduk tu.

“Berindik ari nya, aku ngarapka peranak di menua tu, anang mendingka jaku asut enggau berita pelesu bekaul sapa bagi deka nyadi chalun ari BN laban kitai enda milih chalun bukai ditu kelimpah ari YB Anyi (Ngau),” tandu iya.

Ngelansa pasal Jalai MiriMarudi, Penguang ke mega ADUN Marudi madahka jalai alun nya benung digaga lalu deka tembu enda lama da agi, iya udah ngena peneleba diri pengelama 30 taun gawa perintah ngemansangka menua Marudi.

“Kelimpah ari nya, nyema bisi penusah bah tauka tanah tekerap nyadi, rayat enggau peranak genturung pendiau tauka ketuai raban bansa patut madah ngagai Sekretariat Penusah Ngenyit Nengeri iya nya Opis Pelilih lalu ukai semina ngelawa pengari rayat aja.”

“Seraya Kepala Menteri kitai mega disadang deka bejadika pengawa nasih tanah Jematan Batang Baram di Kuala Ridan, Marudi enda lama da agi, lalu tu pun pengawa dikena kitai ngemansangka menua Marudi,” ku iya.

Berebak enggau program nya, iya bisi ngemendarka agih belanja penyampau RM150,000 ungkup Gerija Katholik Ulu Teru, RM25,000 ungkup Komiti Pemansang enggau Pengelikun Genturung Pendiau ( JKKK) Rumah Henry Gomes, RM5,000 ungkup Biro Indu Rumah Henry lalu RM20,000 da agi ungkup Komiti Pemansang Kandang Menua (ADC) Sungai Peking. Sama bisi datai bini Penguang, Datin Monica Ukong, Sekretari Politik Kepala Menteri, Alexander Asing Sadai, sereta bala ketuai raban bansa ditu.