Ketegal sida ke tuai enggai kiruh, anak uchu nadai status nyadi peranak menua

KUCHING: Ulah enggai kiruh rebak sida ke tuai dikelala nyadi pun ti ngasuh bala anak enggau uchu sida nadai ngembuan status peranak menua di Belaga, pia ku Kaban Kunsil Nengeri (ADUN) Belaga, Datuk Liwan Lagang.

Ku iya, diatu bisi 32 iku di Pelilih Belaga ti agi megai dokumen gadung (ngembuan status enda dikelala) ketegal apai indai sida suba enda ibuh laban sida enda ngerejista bala anak ngagai Opis Pengerejista Bansa (NRD) pengudah Malaysia ditumbuh dalam taun 1963.

Ku iya, tebal agi sida tu datai ari Long Busang, genturung pendiau bansa Kenyah Badeng, iya nya genturung pendiau pemadu entigis di Belaga.

“Tu pemabu runding bala apai indai sida. Tang sekali agi, nadai perengkaguna ti meruan bisi di Belaga lebuh nya, lalu enti sema sida deka bejalaika pengawa nya, sida meseti ngelawa mengeri ngagai Kapit, ti diasaika sida kelalu jauh sereta begunaka belanja besai kia.

“Nya alai, ba penemu sida, nadai guna ngereja iya laban sida diau jauh ari kandang mengeri. Kedua iya, ba runding sida, laban nadai duit simpan di bank, naka kebuah meseti ngiruh diri?”

“Nya kebuah, taja bisi sekeda bala anak sida chukup pintar, enda ulih nampung pelajar diri laban nadai ngembuan sebarang dokumen. Ketegal nadai sebarang dokumen, bayar pelajar sida deka tinggi, laban nyadi peranak luar lalu sida enda ulih ngasaika pengelebih nyadi peranak menua tu.

“Tu sebansa penanggul ti patut diputarka kami. Tang kitai meri terima kasih ngagai NRD, kenyau ari aku nyereta State’s Legislative, kitai udah ulih mantu mutarka penanggul tu berenggat, kelimpah sida ti nadai ‘status’ meruan.

“Nya alai, ba pekara tu, aku naka ulih nguji mutarka penanggul tu, laban semina raban bekuasa ti ulih nentuka status sida tu, iya nya Menteri Dalam Nengeri enggau tentu mega Menteri Besai. Nya alai kitai naka ulih ngiga jalai mantu,” ku Liwan madah ngagai The Borneo Post di opis iya ditu, ensanus.

Ku iya, kenyau ari program outreach NRD dipejalai di Belaga ari taun 2007, bisi 944 peminta ari sitak Hulu Rejang datai ari penuduk kunsil nengeri Baleh, Belaga enggau Murum, ti nganjung peminta dokumen ti patut.

“Ari penyampau nya, 655 udah mujur bulih dokumen sida, lalu 289 iku agi, kami bedau nemu status sida lalu NRD deka meresa sida silik agi,” ku iya, seraya nambah, bala ketuai komuniti deka seruran mantu NRD ngelala status sida nya.

Taja pia, Liwan bisi pengandal 60 peratus ari 289 peminta nya deka dikeluar enggau dokumen ti patut ba timpuh ti engkeman.

Liwan, ke mega Menteri Muda Bekal Ai meri terima kasih ngagai NRD enggau direktor iya, Jazni Jubli, ti bejalaika program outreach ngagai Uma Baha, Sang Anau, Long Bulan, Belaga apin lama ke udah mantu peranak di menua nya ngulihka dokumen sida. Berebak enggau program sehari nya, bisi 79 iku nganjung peminta dokumen ti patut.

Berebak enggau nya, Liwan berasai lantang meda 90 peratus peranak bansa Penan di Pelilih Belaga, urung 4,000 iku, udah bisi ngembuan dokumen ti patut.

“Kitai pechaya kitai ulih mantu 10 peratus agi dalam timpuh ti patut enggau saup ari ADUN Murum Kennedy Chukpai Ugon,” ku iya nandu.