PIBG SMK Balleh nerima televisyen ungkup perengkaguna satelit komunikasyen
KAPIT: Presiden Serakup Apai Indai enggau Pengajar ( PIBG) Sekula Sekondari (SMK) Balleh, Gendang Sugit nerima televisyen 48 inchi pemesai ngarika sekula nya ari raban Engineering and Architect Consultants ari Konsortium Bumi Consultants and Services Sdn Bhd (KBCS) apin lama ke udah.
Kompeni nya diarika siku ari direktor iya nya David Sengalang, mansutka pekara tu dalam penerang berita ti dikeluarka sida kemari.
Bisi nyempulang David iya nya ACROW Corporation Of America Director of Business Development ( AsiaPacific / MENA Region), Nikola Bertucci.
Televisyen skrin 48 inchi dikemendarka Direktor Ngatur Pengawa KBCS, Janang Bungsu rambau bejadika satelit komunikasyen SMK Baleh kena 6 November 2017. Perengka guna satelit komunikasyen diatu dikena ba makmal komputer SMK Baleh.
Pengawa nyuaka televisyen udah dikemata Kaban Kunsil Nengeri (ADUN) Pelagus, Wilson Nyabong Ijang. Sama bisi datai Sekretari Politik Kepala Menteri Nicholas Kudi Jantai enggau Pemesai Opis Pelajar Pelilih Kapit Philip Keling sereta mega bala pengajar enggau nembiak sekula SMK Balleh.
“Tu sebagi ari Tanggungpengawa Rama Korporat ( CSR) dipejalaika KBCS ngambika dikena di makmal komputer sekula. Diatu bala nembiak ulih meda televisyen skrin ti besai agi nengah servis arus penyambung internet jalur lebar satelit enggau peneras 10Mbps ti udah dilekat kena 4 Oktober 2017,” ku penerang nya.
“Kerejasama enggau sukung diayanka kompeni menua tu bejalaika CSR ngagai SMK Balleh, Nanga Gaat, endang ngayanka konsep 1Malaysia,” ku Nyabong madah. Nyabong udah nya bisi ngemendarka agih belanja penyampau RM5,000 ungkup belanja sekula.
Perengka guna arus penyambung satelit udah dilancharka Sapit Kepala Menteri Tan Sri Dr James Jemut Masing, ke mega ADUN Baleh.
Program nya sebagi ari CSR dipejalaika KBCS, ke alai KBCS meri servis penyanding penemu teknikal ba iya.
Gendang mega dipadah bisi nyebut komuniti enggau kerejasama datai begulai enggau tuju ti lurus nerenakka pemesai guna nyediaka pelajar ti menyana sereta ngaku pelajar nyadi kereban ti nengah transformasyen rama enggau transformasyen komuniti ulih dijapai.
“Kita bisi batang tubuh ti biak sereta ngembuan runding ti pintar. Belajar bebendar nyadi orang ti menyana sereta ngembuan pengidup ti meruan agi dikena mantu orang bukai,” ku Bertucci nitihka jaku peransang dipansutka iya.