Sebelas jematan jalai tebing tasik disadang tembu ba taun 2023
KUCHING: Sebelas jematan ke nyadi penyambung jalai tebing tasik di Sarawak disadang tembu ba taun 2023.
Sapit Kepala Menteri Tan Sri Dr. James Masing madah semua 11 jematan nya begunaka belanja RM5 bilion.
“Semua 11 jematan tu deka nyadi penyambung jalai tebing tasik iya nya ari Sematan di Lundu nyentuk ke Miri.
“Tembu jemah, rayat di nengeri tu enda begunaka servis feri agi,’ku iya ba aum pengarang berita pengudah ngulu Licha Pemansang Jalai Tebing Tasik Sarawak di sebuah hotel ditu, kemari.
Aum pengarang berita nya bela digulu Kepala Menteri Datuk Patinggi Abang Johari Tun Openg.
Masing nambah, 11 jematan iya nya Jematan Batang Sadong, Batang Samarahan, Rambungan, Batang Lupar, Igan, Rajang, Saribas, Sun- gai Krian, Batang Paloh, Muara Lassa enggau Batang Kemena.
Ku iya ke mega Menteri Pemansang Infrastruktur enggau Pengangkut, Jematan Batang Sadong enggau Kuala Tatau udah tembu digaga lalu Jematan Batang Samarahan disadang tembu ba awak ke semak.
“Jematan bukai ke nyadi penyambung jalai Tebing Tasik deka tembu dalam timpuh 5 taun ti deka datai iya nya sebedau taun 2023,’ku iya.
Adun Baleh nya netapka Jematan Batang Lupar deka nyadi jematan ke pemadu panjai iya nya urung 5 KM.
Ngenang kaul ke sama, Masing madah Perintah Besai bisi meri agih belanja ungkup sekeda projek jematan nya.
Saup ari sukut belanja nya ku iya, diberi ngagai projek Jematan Rambungan, Batang Igan enggau Kuala Kemena.
“Projek Jematan Batang Lupar ke beungkus RM1 bilion deka dipekunsi Perintah Besai enggau Perintah Nengeri.
“Ungkus belanja dibagi bela entara kededua perintah, sama bela 50 - 50,”ku Masing.
Dulu agi ari nya ba jaku pengelalu licha, Masing madah pemansang jalai tebing tasik nyadi sebengkah pekara berat dalam perambu pemansang Sarawak 2018.
Iya madah, bajet taun 2018 bela mungkur projek pemansang jalai tebing tasik ti nyambung kandang endur semanjai tebing tasik.
Ku iya, projek jalai tebing tasik ba sepenyauh 900 KM bepun ari Lundu, Asajaya, Sadong Jaya, Sebuyau, Matu nyentuk ke Kuala Tatau, Bintulu lalu lanjur ke Miri.