DEH palan endur ngelaku sereta ngajar teknologi digital ngagai orang dagang
KUCHING: Digital Economy Hub (DEH) palan endur ngajar sereta mandangka pasal teknologi digital kelebih agi ngagai raban biak di nengeri tu.
Ketuai Pemesai Eksekutif Digital Economy Hub, Eddie Wee madahka ngena chara nya raban biak deka ulih ngambi bagi dalam pemansang ekonomi jemah ila.
Ku iya, penumbuh hub nya dikena meri timbal ngagai polisi Kepala Menteri Sarawak ke deka mai tranformasyen ekonomi digital.
“Digital Economy Hub tu ke bendar iya nya inisiatif sektor peribit dikena ngelaku sereta ngajar pasal teknologi digital enggau ngelakuka ngagai orang dagang tauka industri baka ni chara nunda enggau ngemeranka teknologi digital ngagai dagang sida.
“Kenyau ari Hub tu ditumbuhka nyentuk ke diatu, bisi urung 1,000 iku nembiak datai sereta meda kediri empu pasal teknologi digital ti pemadu baru ba makit.
“Aku arap bendar enti semua orang sereta enda ngira industri ulih ngemeran sereta ngambi bagi dalam teknologi digital, kitai deka ulih mai transformasyen ekonomi digital di Sarawak,” ku iya lebuh dikerandau raban pengarang berita.
Dulu ari nya Eddie nerima penemuai basa raban duta besai enggau pengari duta ke bisi nemuai ngagai DEH nya kemari, ti nyengkaum Houmdaophone Soukhaseum iya nya Duta Besai Loas; Rath Many (Duta Besai Kamboja); Le Quy Quynh (Duta Besar Vietnam); Nipa Niranoot (Duta Besai Thailand) enggau Sein Nwe Aw pengari Duta Besai Myanmar.
Penemuai raban Duta Besai enggau pengari Duta Besai menua Asean nya nyerumba Forum Digital Dagang Temuai ke diatur Gerempung Dagang ASEAN-China , ti ngayanka bisi pengerindu ngagai produk DEH.
Objektif penemuai raban nya dikena ngangkatka ekonomi digital di Sarawak, jalai dikena ngelakuka atur ke dipejalaika DEH di Sarawak ngagai duta besai sereta dikena mandangka chara nguna enggau pemanah produk DEH.
Nambahka nya objektif mega dikena mandangka teknologi digital, inovasyen enggau utai ke balat ngachau di Sarawak.
Digital Economy Hub iya nya palan endur pelajar S.T.E.A.M (Science, Technology, engineering, Arts and Mathematics) enggau peminta komersial.
Hub nyendiaka pelasar ngagai semua raban biak ti pandai ngaga enggau penengkebang inovasyen di Sarawak belajar, bekerejasama sereta mantu industri nuju digital.
DEH nyendiaka galeri, 3D Printing Lab, Makers Lab, Fabrication Lab, Training Area, Robotics and Cources, Virtual Reality (VR) studio, enggau Creative Studio dikena nempa mayuh agi orang landik ke tuju ekonomi digital.