Aplikasyen Sarawak Capital Circle ulih mantu orang dagang di nengeri tu
KUCHING: Nengeri tu deka bisi sebengkah aplikasyen ke ulih mantu komuniti orang dagang Sarawak, iya nya Sarawak Capital Circle.
Ketuai Pemesai Eksekutif Digital Economy Hub, Eddie Wee madahka teknologi nya udah mujur dipejalaika di menua China ke dikumbai China Capital Circle ti bisi lebih 600,000 iku penguna.
Eddie madahka sida iya deka ngemeranka teknologi nya di nengeri tu setipak enggau juluk perintah nengeri ke diiring Kepala Menteri Datuk Patinggi Abang Johari Tun Openg dalam transformasyen ekonomi digital.
Dikena meretika aplikasyen Sarawak Capital Circle enggau China Capital Circle ku iya, aplikasyen nya sebaka enggau Facebook tang ukai endur mantaika pemakai tauka mantaika kini tungga raun sereta ke bukai.
“Ba menua china aplikasyen China Capital Circle tu chukup mujur lalu ninting hari penyampau penguna baru nambah urung 300 ngagai 400 iku.
“Berindik ari pemujur nya sereta setipak enggau transformasyen ekonomi digital Sarawak, kami ngasaika diatu maya ke betul kami mai teknologi tu ke Sarawak sereta deka nentuka bisi disediaka ba semua menua Asean.
“Sarawak Capital Cirlce tu endur kitai madah ngagai komuniti orang dagang enggau industri nama projek ke bisi, nama projek ke deka endur beranakka puku, nama projek ti dikerindu enggau ke bukai, lalu tu ungkup dagang ekonomi Sarawak aja,” ku iya.
Eddie mansutka pekara nya lebuh dikerandau raban pengarang berita pengudah nerima penemuai raban duta enggau pengari duta ari menua Asean baka Laos, Kemboja, Vietnam, Thailand enggau Myanmar ba Digital Economy Hub ditu, kemari.
Nitih ku iya, sida ukai semina deka ngerembaika aplikasyen nya di Sarawak aja tang ke serata dunya kelebih agi di menua Asean.
“Kami bisi nyendiaka aplikasyen Global Capital Circle.
“Kami ukai semina deka muka aplikasyen tu di Sarawak aja tang ba semua menua Asean.
“Kebuah pia laban diatu orang ukai nyebut pasal beranakka puku ba domestik tang nyebut beranakka puku ba renggat antarabansa,” ku iya ti endang asal ari Kuching.