Raban pengelikun ke gawa jeman menua siga patut diberi kelai basa
MIRI: Perintah Malaysia patut meri mayuh agi kelai basa sereta pemerat ngagai raban pengelikun ke udah berambun nyawa ngelaban komunis maya menua siga pun taun 1970 kelia.
Siku veteran Polis Field Force Batallion 15, pangkat Sub- Inspektor ( B) Hitler Madeli ngarapka bala ex- polis Field Force ke udah megai senjata belaban enggau komunis pan patut diberi basa sereta pemerat ke sebaka, ngenangka pemerani sereta servis sida iya nyaga pengelikun menua tu kelia.
“Bala bujang berani veteran tu meh ke berambun nyawa, ngena senjata, ngujungka menua kitai ganggam sereta bisi pemaik,” ku Hitler nusui ngagai anak indu iya, Clara Hitler maya baru ulih bejaku lebuh dipasuk ngagai sepital ditu.
Clara madahka jaku nya dipansutka apai iya, alai apai iya diatu raya sakit lalu semina ngena oksigen aja kena nyukung seput kelimpah ari ubat ke dipasuk ngena tichir sereta tiub aja.
Iya madah apai iya diatu ke benung raya sakit napi penyakit riman dilah tikas 4, lalu setengah ari tubuh iya datai ke punggung udah pilai.
Hitler kala betempuh enggau raban komunis kelebih agi di Sibu, alai bisi diripot mayuh munsuh parai sereta raban pengelikun bakal lalu sekeda nya selamat, nyengkaum siku ketuai platun ke nyauka parai maya betimbak enggau kemenis di Sungai Bidut, Naman enggau Durin (di Sibu).
Hari Tiga tu tadi (7 Mac), Hitler dibai ngena ambulan ari Sepital Besai Sarawak (HUS) ngaga Sepital Miri, ke disempulang ulih anak indu iya enggau sida sebilik.
Clara nandu baru madahka apai iya mega ngarapka raban pengelikun bukai ke udah napi beperang dalam kampung belaban enggau kemenis pan patut diberi kelala sereta pemerat, nyengkaum nyukung ruang bilik sida iya.
“Kami sebilik ngarap sereta besampika pengerai apai kami lalu ngarapka iya gerai pulai baru,” ku Clara.
Hitler bebansa Melanau, lalu penatai iya ari Kampung Telian Ulu, Mukah lalu iya bisi lima iku anak.
Ba lansa bukai, Kontinjen Polis Sarawak bisi datai mantu Hitler maya iya agi berubat di HUS, alai iya nerima kerusi ruda sereta wang.