Industri tu mujur nyungkak penatai pemisi eskport penyampau RM357.8 juta ngagai Sarawak ba taun 2017
SIBU: Perintah seruran bebendar mantu industri dalam menua nyengkaum industri ngaga enggau nyeruri kapal (SBSR), ke nyungkak penatai pemisi eskport penyampau RM357.8 juta ngagai Sarawak ba taun 2017.
Menteri Dagang Antarabansa enggau E- Dagang, Dato Sri Wong Soon Koh madah, perintah nengah Opis Menteri Industri enggau Pemansang Pengawa Dagang (MIED) udah ngatur misyen ngelaku ngagai Emeriah Arab Bersatu (UAE) kena Mei taun ke udah.
Kelimpah nya, ku iya, MIED mega mantu Gerempung Limbungan Kapal Sibu (SSA) nyereya ekspo dalam enggau luar menua endur nyendiaka pelasar ke besai agi dikena sida ngerembaika makit dunya.
“Ba pengawa kitai ngemanahka infrastuktur ba Kandang Industrian Rantau Panjang, perintah nengeri udah ngungkupka penyampau RM10.7 juta dikena ngemanahka infrastruktur.
“Pengawa ngemanah tu udah berengkah 3 Januari 2018 lalu dipelaba tembu manggai taun 2019. Enti udah tembu, iya deka mutarka penanggul parit ti ngujungka penusah bah enggau parit alit,” ku iya.
Wong madah munyi nya rambau bejadika Pengawa Angkat Sumpah Kaban SSB Ke-32 (2018-2019) seraya ngintu Taun Baru China ba sebuah hotel ditu, malam ensana.
Sama bisi datai Menteri Muda Perengka Pengangkut Mensia Mayuh Datuk Dr Jerip Susil, Sekretari Mendam MIED Sarawak, Datuk Liaw Soon Eng, Residen Bagi Menua Sibu Charles Siaw, chairman SSB Ngieng Ping Sing, chairman pengatur pengerami Ling Tiu Khing sereta ke bukai.
Wong ke mega Menteri Wang Kedua madah, perintah mega udah ngungkupka sitak urung 250 ekar dikena nangkir Sitak Industri Rantau Panjang, lebih agi dikena ngaga enggau nyeruri kapal.
“Perintah nengeri mega udah nyendiaka tanah ba Tanjung Manis enggau Paloh ungkup industri ngaga kapal. Tikas penalam ai ba endur nya ngemuntang pengawa ngaga kapal ke lebih besai nyengkaum ngaga pelantar minyak.
“Kelimpah nya, MIED mega deka neruska pengawa ngemansangka Kandang Industri Sibu ke ngembuan pemesai 150 ekar ba taun tu. Kandang industri tu disikap enggau perengka guna ke chukup, meri peluang ngagai pengawa ngemansangka industri jelan mit ( SME) peranak menua tu dikena muka kilang enggau gudang,” ku iya.
SBSR kenu ku Wong, en- dang sebengkah industri ke beguna amat ba Malaysia lalu bisi urung 100 penyampau semua kapal ke bisi ba serata menua, lalu 68 ari nya bepalan ba Sarawak.
Ari 68 penyampau kapal nya, 42 bepalan ba Sibu, lalu ngujungka Sibu nyadi palan industri dikena ngaga enggau nyeruri kapal ba menua tu.
“Aku andal industri ngaga enggau nyeruri kapal di Sibu deka terus nyungkak ekonomi Sarawak, lebih agi ba Sibu.
“Sehari tu, Sarawak ulih ngaga mayuh bengkah kapal baka kapal pemantu tebing pantai, kapal tunda, bot ekspres enggau ke bukai ti ulih nyapai standard antarabansa sereta dieksport ke Singapura, Indonesia, Hong Kong, Vietnam, Kepulauan Solomon, Brunei Darulsalam, Papua New Guinea, Timur Tengah, Amerika Syarikat enggau Australia.
“Ba 2016, Sarawak mujur eksport kapal berega RM376.5 juta nangkah nya taum 2017, eksport ti berega RM357.8 juta,” ku Wong.