85 peratus pengundi dipelaba deka nurun ngundi ba Pengawa Bepilih Besai ke-14

PUTRAJAYA: Komiti Pengawa Bepilih Besai (SPR) melabaka 85 peratus ari pengundi berejister nurun ngundi maya Pengawa Bepilih Besai ke-14 (PRU14) ila, ku Chairman SPR Tan Sri Mohd Hashim Abdullah.

Iya madah pengawa nya deka tejapai enti bisi sukung sereta kerejasama ari semua piak lebih agi raban media.

“Ku iya, gaya politik bebalut enti bisi pengawa piak nguji ringat lalu enda nurun ngundi kelimpah ngerusak undi nya tau bendar ngeruga peratus sida ti nurun ngundi maya PRU14 ila,” ku iya rambau bechairmanka Aum Komiti Kimpin ‘Jom Semak Dan Jom Kita Mengundi’ di SPR ditu kemari.

Mohd Hashim madah, SPR ngatur aum tu dikena ngepunka kimpin dikena meransang raban pengundi berejister meresa b penerang diri bekaul enggau pengawa ngundi.

“Kelimpah nya, iya mega deka meransang sida nurun bejalaika tanggungpengawa diri ba hari ngundi maya PRU14 ila.

“PRU disadang diatur sebarang maya. Nyadi beguna amat bala pengundi meresa status ngundi diri empu sebedau pengawa bepilih besai ngambika sida nemu penerang ke amat bekaul enggau pengawa ngundi,”ku iya.

Ku iya naka Suku Taun Keempat 2017 urung se- mak 15 juta pemilih ke ulih ngundi.

Penyampau kebendar pemilih berejister iya nya 14,968,304.

Mohd Hashim madah Kimpin ‘Jom Semak’ enggau ‘Jom Kita Mengundi’ nya betuju dikena ngangkatka tikas penyedar pemilih bekaul enggau aktiviti ngundi ke nyelinting ulih nyapai 85 peratus orang nurun ngundi.

Iya madah SPR udah ngaga kerejasama enggau sekeda opis menteri, opis enggau ejensi perintah sereta piak media, kelimpah minta gerempung ukai dikuasa perintah (NGO) nyaup ngemujurka kimpin.

Ku iya, SPR deka madah rasmi haribulan bekaul enggau maya haribulan orang ulih meresa penerang sida bekaul enggau pengawa ngundi.

SPR udah ngaga pelin komunikasyen kimpin dikena nentuka penerang bekaul enggau pengawa nya ulih dikerembai enggau mujur,” ku iya.

Entara ke bisi ngambi bagi iya nya Opis Menteri Komunikasyen enggau Multimedia, Opis Menteri Pengawa Berumah enggau Kaunsil Kandang Menua, Opis Pemadah Malaysia, Opis Pemansang Islam Malaysia, Komiti Komunikasyen enggau Multimedia sereta media perintah enggau swasta baka RTM, Bernama, Media Prima, Astro, TV AlHijrah sereta Raban Karangkraf. — Bernama