Pemujur program Seminar Peransang Pelajar Jaku English dipuji Collin
KUCHING: Seminar Peransang Pelajar Jaku English keterubah bisi diatur kena 3 March tu tadi bepalan di sebengkah genturung pendiau di Simanggang lalu udah nerima timbal chukup manah ari mensia mayuh.
Seminar tu diatur dibaruh Projek Pensel nengah kerejasama Serakup Dayak Sarawak (PEDAS) lalu diungkup ngagai nembiak sekula primari, diatur sehari nyentuk.
Presiden PEDAS, Capt (B) Collin Imran, ke sama bisi datai berasai temegah ati sereta muji pengeransing raban Projek Pensel ngangkatka anak Dayak di nengeri tu kelebih agi menua pesisir ba pelajar Jaku English.
“Kitai bela nemu sereta sedar Jaku English tu dikena di serata dunya lalu nyadi batang jaku penemu pelajar Sains, Teknologi sereta mega Ekonomi kemaya hari.
“Ukai reti jaku kitai Iban enda diguna, tang kitai meseti nitihka singkang dunya, bela ngerebut awak belajarka penemu enggau pengelandik ti tau nyadi pengelebih ngagai bala anak kitai nangkup peminta makit kereja kemaya hari,” ku Collin meransang.
Pia mega ku Collin, apai indai patut nemu tanggungpengawa diri ba pekara pelajar bala anak laban semua pekara bepun ari ruang bilik sida, nyengkaum nempa ulah ti menuku.
Nya kebuah ku iya, nadai salah apai indai meransang diri sereta bisi pengiruh ngulu sebarang seminar tauka program ti ngaul pelajar bala anak sida sekalika di sekula tauka diatur raban gempung ukai dikuasa perintah (NGO) ke bukai.
Norina Umoi Utut ti ngepunka Projek Pensel tu madah batang tuju seminar tu dikena meri penerang pemesai guna pelajar ungkup rebak baru berengkah ari umur biak.
Kelimpah ari nya ku Norina, seminar tu mega nyadi siti ari pelasar ngiri penemu enggau matih bala nembiak ngambika landik sereta angkunka pelajar Jaku English nengah chara belajar ti senang sereta nitihka renggat umur sida.
“Tu seminar diatur nyelinting raban dituju, peranak menua pesisir, datai ari ruang bilik kurang penatai pemisi tang bisi pengeran ba pelajar baka pelajar Jaku English.
“Kami sebuat endang rindu meda kitai bansa ti bisi pengiruh nyengula enggau meransang bala anak sida belajar laban kami nemu, semina nengah pelajar aja ulih ngemansutka kitai ari tekul penyeranta,” ku Norina madah nyemetak.
Nangkan nya ku Norina, seminar tu mega mai raban Projek Pensel ngaul diri semak begulai enggau bala komuniti, ngerapit sereta nanggam teguh pemanah kaul enggau pangan diri seraya bekunsika penemu enggau peneleba.
“Kitai ke bisi datai ditu sehari tu nyata ngayanka diri angkun deka begulai ngiga penemu ngemansangka ruang bilik, pelajar sekula anak sereta mega tikas penemu ba pekara bukai.”
Antara atur program ngisi seminar iya nya meri latih nero, ngarang enggau belagu ngena Jaku English, kelimpah ari seminar meri licha pasal peransang ba pelajar sekula enggau pelajar rama begulai enggau bala nembiak ti dike- nataika Norina empu.
Raban Projek Pensil baka program sebedau tu mega bisi nyuaka pemeri kereban tulis enggau perengka sekula ngagai bala nembiak.
Bisi 20 iku nembiak mit datai ngulu seminar tu disempulang apai indai sida kelimpah ari peranak ke diau besemaka nyengkaum bala ketuai komuniti sereta bala bukai.