Sida meseti seruran ngemataka bala anak lebuh di rumah ngambika pelajar seruran diteruska sepengudah pulai ari sekula
SRI AMAN: Apai indai dilalau meri kerejasama ti rat ngagai pengajar dikena nentuka anak sida teulihka pelajar ti menyana. Kerejasama tu meseti ditumbuhka ketegal apai indai iya nya orang ti keterubah ke begulai enggau anak sida di rumah.
Menteri Muda Pengelantang Komuniti Sarawak Datuk Francis Harden Hollis madah, apai indai kebendar nya megai tanggungpengawa nyadi pengajar ngagai bala anak sida di rumah lalu seruran ngemataka bala anak nyambung belajar di rumah nembuka pengawa ti dibai ari sekula.
Harden ke mega Kaban Kunsil Nengeri ( ADUN) SImanggang madah munyi nya lebuh ti bejaku maya bejadika Program ZUmbathon Gerempung Apai Indai enggau Pengajar (PIBG) Sekula Sekondari (SMK) Sri Aman ti bepalan ba Balai Hollis Tini sekula nya empu, pagi kemari.
Ku iya, tetiap apai indai megai pengawa ti berat dikena nentuka tikas pelajar bala anak seruran dikemerat ukai semina ba sekula tang mega di rumah.
“Mayuh apai semina ngengkahka pengawa nyeridi anak ngagai pengajar di sekula tang nyadi apai indai, sida patut nemu iya nya sida mega megai tanggungpengawa ti besai ba rumah dikena nentuka pelajar bala anak di sekula bisi diteruska ba rumah,” ku iya.
Ku iya nambah, perintah nengah Opis Menteri Pelajar udah nyediaka mayuh perengkaguna khas dikena ngangkatka kualiti pelajar menua. Kelimpah ari nya, chara sereta gaya pelajar ti engkeman mega bisi dibantaika ngagai bala nembiak ngambika sida jampat agi nemu sereta nerima nama pan penemu ti diajar pengajar sida.
Beserimbai enggau nya, Opis Menteri Pelajar mega udah nyediaka mayuh macham insentif ke diberi nengah mata duit dikena mantu bala nembiak sekula ti begunaka nya lalu sida pan bisi peransang belajar.
Iya mega mesan ngambika semua raban nembiak sekula landik ngena perengkaguna pelajar ke bisi kelebih agi ti ngaul internet.
“Baka ti udah ditemu semua, bisi mayuh palan enggau berandau baka ‘Facebook’, ‘ WeChat’, ‘ Whatsapp’, ‘Twitter’ enggau myuh agi ke bukai ti ulih nyadi pelasar dikena bala nembiak bejuraika penemu enggau pangan diri.
“Taja pan pemisi palan endur berandau tu endang manah tang kitai enda ulih nyeliahka pekara ti enda disadang nyadi nyema kitai enda likun ti ngujungka nyadi mayuh macham pekara nipu ari piak ti semina deka beambi ulih lalu nya ti sekeda orang ti kena tipu,” ku iya nambah.
“Berindik ari nya, laban mayuh bala nembiak diatu udah landik sereta nemu bekenaka komputer, iya ngelalau apai indai ngambika matau tikas pengawa sida ngena komputer di rumah. Enggau jaku bukai, apai indai mega patut ngerara anak sida nyema ditemu ngena komputer enggau pengawa ti salah ungkup pekara ti enda betul kelebih agi lebuh sida bekenaka internet,” ku iya nambah.
Sama bisi datai ba program nya, Residen Sri Aman Indit Bangai, Prinsipal sekula, Chairman PIBG SMK Sri Aman Jilin Itar, pengajar kanan sereta apai indai sekula nya.
Ba program nya, bisi 1,600 iku nembiak nyengkaum apai indai bisi ngambi bagi dalam program nya ditu kemari.
Mayuh aktiviti ti bisi digaga bewserimbai enggau program nya nyengkaum Senamrobik, seruyuk endur bejual enggau chabut tikit benasit.