PETROS deka nentuka Sarawak ulih mansang seriris enggau nengeri bukai
KUCHING: Nengah pemisi industri minyak enggau gis kediri empu ulih nyungkak pemansang Sarawak.
Menteri Muda Elekterik Menua Pesisir Dr Abdul Rahman Junaidi madahka diri temegah ati ngagai pemujur Perintah Sarawak ti numbuhka Petroleum Sarawak Berhad (PETROS) sebuah kompeni ke diempu penuh perintah nengeri ti deka mansutka asil enggau bejalaika industri minyak enggau gis ke bisi ba nengeri tu.
“Pemansang nengeri ulih disungkakka agi setipak sereta sebaka enggau nengeri bukai di Malaysia nengah pengawa ngemansutka asil rampa menua asal ke dipejalaika peranak nengeri tu empu.
“Diatu udah datai ba maya iya asil nengeri dipejalaika peranak nengeri tu empu ke ulih nyungkka pemansang nengeri.
“Pasal penumbuh PETROS ulih Perintah Nengeri asil penemu YAB Kepala Menteri Sarawak endang amat patut sereta ngena amat dikena ngambi baru hak rayat Sarawak dalam industri petroleum tu,” ku iya madah ngagai Utusan Borneo nengah aplikasyen ‘WhatsApp’, kemari.
Dr Abdul Rahman mansutka pekara nya lebuh dipinta meri penemu bekaul enggau pekara ti dibantaika Kepala Menteri Datuk Patinggi Abang Johari Tun Openg lebuh bejadika PETROS, ti madahka Menteri Besai Datuk Seri Najib Tun Razak udah setuju meri pulai baru hak enggau kuasa ke udah ukai sengaja majak lenyau betaun ke udah.
Berindik ari pekara nya Abang Johari madahka Sarawak deka ngemansutka pengeraja asal minyak enggau gis ti nitihka Perlembagaan di baruh ‘ Senarai Negeri’ baka dalam ‘Jadual Kesembilan Perlembagaan Persekutuan’.
Kelimpah ari nya Dr Abdul Rahman madahka sejarah tetemu enggau ngaga minyak ti berengkah kenyau ari taun 1910 udah muka peluang ngangkatka penatai pemisi nengeri enggau menua nengah industri minyak enggau gis.
Nengah sempekat ke dulu disemaya nya udah ngungkupka iya nya hak Sarawak endang udah diungkupka dalam nyerungkai minyak enggau gis kenyaun ari taun 1930 sereta nyentukka sehari tu.