Dalat bulih pemutus peresa UPSR 2017 ti pemadu nyulut di Sarawak

MUKAH: Pelilih Dalat udah nyapai pemutus peresa UPSR ti manah dalam timpuh 13 taun ba taun 2017.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah, penyulut nya mega iya nya ti pemadu manah ba selampur Sarawak ba taun ke sebaka.

“Pemutus enggau penyulut tu iya nya pekara ti endang ngandalka semua peranak Dalat kelebih agi raban Opis Pelajar Pelilih Dalat, sekula, pengajar, nembiak sekula, apai indai sereta komuniti,” ku iya bejaku ba Program Pelajar enggau Pengawa ti bepalan ba Sekula Sekondari (SMK) Oya kilah ensana.

Ku iya, tu mega iya nya pengeransing piak ti bekaul ke bebendar ngemeratka pelajar ba tikas sekula primari.

“Udah tu, nyema nembiak sekula ngagai tikas sekula sekondari, sida deka mudah agi nyapai penyulut,” ku iya.

Ukai semina pemutus UPSR, tang pemutus peresa STPM mega ngayanka pemutus ti manah lalu SMK Oya ba penuduk ke-24 ti pemadu nyulut ungkup sekula di selampur Sarawak.

Beserimbai enggau nya, Fatimah mega ngelalau semua piak ngambi neruska pemujur nya ungkup pengidup bala nembiak jemah ila ngambika sida nyulut dalam tetiap bidang enda ngira ari sukut akademik, ulah diri sereta kokurikulum.

Iya mega madah deka terus meri peransang eng- gau meri wang turu sereta bantu ngambika pengawa ti deka ngangkatka pelajar lantang dijapai lalu enda napi pemar.

Ba pengerami nya, Fatimah mega udah nyuaka Geran Projek Mit (MRP) ngagai piak sekula sereta mega insentif ungkup sekula nya ti udah teulihka pemujur ba taun 2017.

Bekaul enggau ekspo, nya semina siti entara pengawa dikena meri penemu ngagai nembiak ke udah tembu STPM sereta SPM bakani chara deka ngisi pom ‘online’ sereta servis meri licha bekaul bidang ti engkeman diambi.

Bisi 34 ejensi ari mayuh macham intsitusyen di selampur Sarawak tu udah ngambi bagi dalam ekspo nya.