UPP nyima enggau jaku ti udah dipansutka Dr Sim
SIBU: Parti Rakyat Bersatu (UPP) mejah penerang ari Presiden Parti Sa’ati Rayat Sarawak (SUPP) Datuk Dr Sim Kui Hian ti deka minta UPP betemu enggau Psikiatri enti sema agi enda meretika genteran jaku ‘ pulai baru ngagai bilik SUPP’.
Presiden UPP Dato Sri Wong Soon Koh enggau sapit iya, Datuk Dr Jerip Susil sereta Mandal Presiden Kanan UPP lebuh mansutka penerang begulai kemari madahka jaku ti dipansutka Dr Sim kelalu negatif.
Ku sida, Dr Sim udah mantaika pekara besai ni naka penyauh kredibiliti enggau integriti iya nyadi siku presiden parti enggau mega ketuai.
“Kami beratika penerang iya chukup berat sereta ngemaruh laban iya pansut ari mulut siku ketuai enggau mega presiden parti.
“Kami bisi nyima lebuh iya deka ngasuh kami (UPP) ngagai Psikiatri,” ku sida lebuh ngatur aum pengarang berita kilah ensana.
Kelimpah ari nya, sida mega madahka ulah Dr Sim ngeluarka jaku baka nya deka ngasuh kaul retai agi antara UPP enggau SUPP.
Tambah mega, UPP sebedau tu nadai kala dipinta enggau pengabis ati pulai baru ngagai SUPP lalu baka selama (peminta) digaga nengah media.
Seraya udah didawa ngeluarka penerang nya ngagai pengarang berita pengudah ngulu sebengkah program di Kuching kemari, 6 Mac.
Dr Sim dipadah bisi man- sutka jaku madahka UPP patut pulai baru ngagai SUPP laban Kepala Menteri enggau Menteri Besai mega kala berandauka pekara ke sama.
“Tambah mega, kelimpah nyema kitai enda nemu reti jaku. Ba runding aku enda patut kita enda meretika jaku nya, ba aku, kita enggai meretika iya lalu ngagai sida ti enda nemu reti ngambika aku nganjung kita ngagai Psikiatri.
“Laban semina siti nya aja kena ngubat ti ulih diberi aku ngagai kita. Nama agi ulih diberi aku ngagai kita? Aku nyangka enda landik dalam perubat mantel/untak, tang aku bisi mayuh bakih sama gawa lalu aku nemu sapa bagi pemadu manah di Batu 7,” ku Dr Sim.
Ku sida, penerang nya antara jaku ke bisi disaut Dr Sim ngagai pengarang berita ti dianjung ngagai sida.
Sida mega madah bisi ngembuan rekod randau Dr Sim enggau pengarang berita nya.