Rambai jaku ‘Love Yourself First’ dipilih Pampang Indu SUPP nyambut WWD

KUCHING: Pampang Indu Sentral Parti Sa’ati Rayat Sarawak ( SUPP) udah netapka rambai jaku nyambut Hari Orang Indu Entarabansa (WWD) iya nya ‘Love Yourself First’ (sayauka diri empu dulu).

Chairman pampang indu nya, Koh Teck Wan madah Hari Orang Indu Renggat Entarabansa nya dikena ngaku pemujur ti udah dijapai orang indu, enda ngira asal menua, bansa, gaya ekonomi tauka politik.

“Ari nyadi ketuai menua ngagai saintis, tauka indai orang, orang indu ngembuan tanggungpengawa ke berat ba tetiap sukut komuniti kemaya hari tu.

“Sigi baka kitai indu, siruka orang bukai tang kitai indu tu seruran enda ingat nyaga diri empu.

“Nya alai taun tu, Pampang Indu Sentral SUPP nyambut Hari Orang Indu Entarabansa ngena rambai jaku ‘Love Yourself First’.

Rambai jaku nya betuju ngelalau kitai indu siru ke kitai empu dulu sereta beratka pengerai,” ku iya madah nengah penerang jaku nya kemari.

Ku Kho, nadai utai bukai berat agi enti ukai pengerai kitai empu.

Iya mega meransang orang indu seruran ngembuan ulah ke nemu sereta majak belajar, enda ngira umur sida.

“Enggau gaya dunya ti diuan kitai seruran berubah, kitai enda patut berasai nangi enggau teknologi baru, tang majak belajar ngena teknologi baru nya ke pemaik pengidup kitai ninting hari.

“Ukai semina nya aja, laban orang indu mega patut regas enggau ba ekonomi digital, ke nyadi sebengkah ari inisiatif Perintah Nengeri Sarawak ngemansangka ekonomi rama rayat Sarawak,” ku iya.