Kelimpah enda ekonomi ngagai atur sekula, penanggul kurang nembiak mega deka ngujungka sida kurang besemekih
SIBU: Menteri Muda Pelajar enggau Pansik Teknologi Dr Annuar Rapaee ngelanggur ngasuh Sekula Bansa China (SJKC) ti kurang nembiak dipindah ngagai sitak ke ngembuan rayat ke majak nambah.
Dr Annuar madah, kelimpah enda ekonomi ngagai atur sekula, penanggul kurang nembiak ke ditapi SJKC mega deka ngujungka sida kurang besemekih.
“Polisi perintah sigi enda nutup dedini SJKC ke ditumbuh ba nengeri tu laban SJKC udah mayuh mantu nyaup ngemansangka pekara pelajar ba menua tu,” ku iya.
Iya madah munyi nya rambau ngintu Pengerami Ulang Taun Ke-90 SJKC Kiang Hin enggau Pengerami Taun Baru China (TBC) di sebuah hotel ditu , ensana.
Kenu ku iya, perintah nengeri mega bisi ngasuh nyengulaika sekula.
Taja pia, ku iya mayuh sekula enda setujuka perambu nya.
Kenu ku Dr Annuar, iya chukup tekuing ati meda pengeransing, pemerani enggau pengeliat ati ti dipandangka komuniti China dalam nentuka nembiak rebak baru disikap enggau pekara pelajar sereta penemu sekula.
“Laban ke nyadi Bumiputera, aku suah berasai ngining komuniti China lebih agi ba pengawa sida ngemeratka pemesai reti pekara pelajar,” ku iya.
Iya mega madah, numbuhka opis menteri nya dibaruh iring Dato Sri Michael Manyin Jawong endang engkeman amt lalu berebak enggau nya deka mutarka sekeda penanggul ke ditapi sekula kemaya hari tu.
Entara penanggul nya nyengkaum ngaduka sekula ke udah buruk enggau enda chukup pengajar ba mata pelajar Sains, Matematik enggau Jaku English.
Dr Annuar mega meri pengaga atingagai sekula nya ke udah ngintu ulang tahun ke-90 lalu ngarap sekula nya terus mujur dalam timpuh 100 taun agi.
Laban ke ngembuan rayat pupu bansa enggau mayuh jalai pengarap, iya meransang mensia mayuh anang ngangkaika bida ke bisi enggau pangan diri.
Tang ku iya, semua piak patut bela besaup ngemansangka menua enggau nengeri tu.
Sama bisi datai Menteri Wang Kedua ke mega Menteri Dagang Antarabansa enggau E-Dagang Dato Sri Wong Soon Koh sereta Chairman Pengatur Sekula enggau Presiden Gerempung Hin Hua Poh Sen So Teck Kee. MIRI: Polis mujur nangkap tiga saspek ke dipelaba bisi kaul enggau pengawa nyerungkai rumah ba dua bengkah endur, malam ensana.
Nitihku penerang, ba pengawa nangkap urung pukul 11 malam nya, dua saspek ditangkap ba sebengkah endur di Pujut Tanjung Batu, udah nya siku agi ba Piasau Jaya.
Kenu ku penerang nya mega, saspek lelaki bela beumur 22 nyentuk 30 taun, ditanglap maya deka nyual barang ke dichuri maya nyerungkap rumah iya nya tiga buah mangku ke ditaruh dalam sebuah kerita.
Tiga saspek ke ditangkap udah dibai ngagai Balai Polis Pusat Miri ngambika dipansik silik.
Sebuah kerita enggau kerusi ke dalam kerita nya mega dirampas nyadika perengka kes.
Berebak enggau nya, siku orang ke kena serungkai rumah ba Piasau Garden apin lama ke udah ngasaika diri rugi urung RM100,000 pengudah 10 kali rumah iya diserungkai raban orang ke nadai dikelala.
Nitihku penerang, penusah pemadu baru nyadi minggu siti ke udah maya sida sebilik kemisi raun ke Johor.
Orang ke pemadu baru kena tinggal penusah ke sebaka bisi ngaga ripot polis bekaul enggau penyadi nya malam ensana.