Pemansang ekonomi digital meri mayuh pemaik ngagai semua piak
SARIKEI: Atur pengawa Ekonomi Digital Sarawak ti dipungkal Kepala Menteri, Datuk Patinggi Abang Johari Tun Openg taun siti nyin tadi, siti ubah paradigma global dalam pemansang ekonomi menua Sarawak.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah, atur ekonomi digital nya deka meri peluang sereta meri mayuh pemaik ngagai semua piak besemekih sesama diri empu, nyengkaum kompeni besai nyual produk sida iya datai ngagai renggat global ke nadai adan.
“Perintah ngarapka bala nembiak mupuk ngemansang sereta ngenyemakka diri dalam dunya dagang, sereta nambah penemu bekait enggau ekonomi digital.
“Enti kitai meri kelala tauka mantaika produk kitai nengah ekonomi digital tu, iya deka meri peluang ngagai kitai empu, nyual sereta ngerembaika produk nya ngagai makit ke besai agi, lalu iya enda begunaka kos ke besai.
“Kitai ngambi penguntung ari pengelandik kitai ngena teknologi pintar, kitai ulih matak komuniti ari serata dunya meda sereta meli produk ke digaga kitai. Nya alai, aku ngarapka sida ke bedagang ngambi penguntung ari perengka guna ti disediaka ulih Perintah tu,” ku Len.
Iya madah munyi nya nen- gah teks jaku iya ti dibacha ulih Pegawai Hal Ehwal Khas (JASA) Pelilih Menua Sarikei, Ahmat Adai ba atur pengawa Konvensyen Kelab Usahawan Iktiar Cawangan dan Kesukarelawan Sarikei, Kelab Usahanita Berjaya Sarikei, ti digaga di Palan Inovasi Sarikei (SIC) ti digulu ulih urung 100 iku kaban kelab nya, kemari.
Len nandu baru madahka, nengah pengawa nya ke benung digaga ulih Amanah Iktihar Malaysia (AIM), iya ngarapka AIM ulih ngelatih mayuh agi raban orang dagang ke mujur di menua tu.
Iya madah, nengah mayuh macham program ke digaga sereta iring embing AIM, iya ulih muka mata sereta runding sekeda mensia mayuh bekait enggau peluang dagang ke bisi ngelingi sida iya, lalu digaga nyadi siti ari penambah pemisi sida iya.
“Kami ngarapka raban tu enda muai jam sidam, tang angkat ngerebut barang peluang ke bisi. Anang kena tinggal, laban pemansang dunya globalisasi kemaya hari tu, begunaka tiap iku kitai jampat ngerebut peluang nya.
“Buka mata sereta pending kitai, lalu ngaga semua pekara nya ke nyadi ngelingi kitai, siti peluang ke pengabis manah kena kitai ngemansangka diri,” ku Len.
Sama bisi ngulu atur pengawa nya, Menijer AIM sitak Menua Tengah Sarawak, Hajah Haryati Dahari.