Baram udah dibagi ngagai tiga pelilih menua, atur mayuh agi program ditu
MARUDI, LONG LAMA: Pemesai kandang menua Baram udah dibagi ngagai tiga pelilih menua lalu nya kebuah iya begunaka kerejasama enggau pemayuh tubuh rayat datai gawa baka di Pasar Long Lama, patut ngatur mayuh agi program nangkup peminta rayat ditu.
Ulah sedarka pengelikun di jalai alun sereta penusah bebadi patut nyadika lalau ngagai sida ti betengahka jalai. Kitai semua nemu, peranak di Baram udah disambung jalai taja ukai jalai nitihka standard baka di mengeri lalu tebal agi jalai batang, tang kitai meseti bebasaka atur enggau undangundang jalai alun.
Jaku tu dipansutka Kaban Parlimen (MP) Baram Anyi Ngau lebuh bejaku ba pengawa bejadi muka Seminar Kesedaran dan Keselamatan Jalan Raya diatur JKJR ti diatur nyerumba Sehati@RTM Singah Lokasi di SJK Kee Tee, Long Lama ditu, apin lama ke udah.
Ku Anyi nambah, urung 400 iku bebadi nyawa ba penusah bebadi di jalai alun lalu penusah tu enda disadang kitai tau nyadi, taja bisi lisin deriba, tang ulah maya deriba mega patut diperati.
Seraya Kaban Kunsil Nengeri ( ADUN) Telang Usan, Dennis Ngau, bela bisi mansutka jaku pasal pengelikun jalai alun patut dikemerat dikena nyeliahka sebarang penusah bebadi.
Ku iya, nya kebuah kitai ngulu seminar pasal penyedar enggau pengelikun jalai alun laban bisi sekeda mabuk maya deriba lalu tu tau ngeruga pengelikun diri enggau orang bukai.
Jalai di Long Lama ditu, sida ti ngena motosikal nadai kiruh ngena ketapu pengelikun tang ulah sida nya tau ngenusahka diri.
Sama bisi datai Direktor JKJR, Devina Agnes Entili, Sapit Residen Miri, Nyurak Keti, Kontroler RTM Miri, Zaidi Bujang, Tabad sakai enggau Temenggong Elizabeth Deng.
Bisi 500 iku datai ngulu seminar tu lalu bisi mega pengawa nyuaka angpau ngagai bala nembiak sekula enggau orang tuai.