Juluk menua tejapai enti terus likun, rayat meruan beserakup

LIMBANG: ‘ Wawasan’ 2020, Tranformasyen Nasional 2050 (TN50) enggau Sarawak nyadi nengeri maju 2030 deka tejapai nyema menua terus likun lalu rayat ngetanka pengelantang enggau penyerakup.

Menteri Muda Betanam Betupi Dr Abdul Rahman Ismail madah, kerejasama ke dikemeran rayat ari mayuh pengarap deka ngujungka menua engagu nengeri tu terus kering sereta mansang.

“Enti kitai nadai kerejasama, belaya sereta beperang enggau pangan diri baka ke nyadi ba menua luar pengawa pemansang ke dipejalai perintah tentu deka tejanggal.

“Pia mega Wawasan 2020, TN50 enggau Sarawak nengeri maju 2030 dikearap ulih dijapai enti enggau mujur ngambi dikena nyungkak ekonimi menua enggau nengeri tu,” ku iya rambau pengerami Taun Baru China 2018 diatur Serakup Gerempung-Gerempyng China Limbang ditu, ensana.

Iya mega minta rayat terus begulai dalam ‘ siti kapal’ enggau ‘siti rumah’ begulai enggau perintah besai nengah sukung nadai bebagi ngagai Barisan Nasional (BN) ba Pengawa Bepilih Besai Ke-14 (PRU14) enda lama agi.

“PRU14 deka diatur enda lama agi lalu iya dikumbai ‘indai’ ngagai semua pengawa bepilih besai,” ku iya.

Ku iya, pengawa bepilih nya endang atur ke endang digaga ba menua ti ngemeranka sistem demokrasi beparlimen.

Iya minta rayat terus nyukung BN nyengkaum komuniti China ba Limbang.

“Kebuah pia laban perintah BN udah mayuh misyen ngemansangka menua tu lalu kitai deka perintah Malaysia terus diiring BN,” ku iya.