Perintah nengeri Sarawak ngarapka pengelandik pengarang berita nemu ni bagi berita ke betul tauka enda, ku Abdullah
KUCHING: Perintah nengeri tu enda nguasa pengawa pengarang berita ke deka ngaga berita sida iya, laban nemu bakani ku pengelandik pengawa sida iya ke landik nulis tauka nabur berita ke betul, ke Menteri Muda di Opis Kepala Menteri (pampang Pekara bekait enggau Korporat), Abdullah Saidol.
“Sempama dalam Jaku Melayu ‘ janganlah kerana nyamuk, kelambu dibakar’. Bedau lama tu tadi, aku bisi ninga berita pasal siku raban politik ke enda nyamai ati lebuh ditanya pengarang berita (bekait enggau pekara politik).
“Maya pekara nya nyadi, aku ngarapka bala pengarang berita besabar... Aku deka mantaika pekara tu dalam aum Pengawa Bepilih Besai Menua ke-14 (PRU ke-14) ke betanggungjawab pasal pengarang berita enggau kaul mensia mayuh,” ku Abdullah.
Iya madah munyi nya lebuh bejaku ba atur pengawa ‘Majlis Tautan Mesra Bersama Media 2018’ di White Barouk ditu, kemari, ke bela digulu ulih urung seratus pengarang berita ari media chelak enggau elektronik.
Sama bisi enggau ngulu atur pengawa nya kemari, Kaban Kunsil Nengeri ( ADUN) Demak Laut) Dr. Hadzland Hipni, Direktor Opis Pemadah Sarawak, Abang Sardon Abang Hashim, Pegawai Tadbir Khas di Opis Kepala Menteri, Datuk Norhyati Ismail, Direktor JASA, Hassan Busu, chairman Gerempung Pengarang Berita Pelilih Menua Kuching (KDJA) Jacqueline David enggau chairman Gerempung Jurugambar Press Sarawak (SPPA), Radzi Bujang.
Ba jaku iya mega, Abdullah madahka Perintah Menua Sarawak besetuju enggau perambu Perintah Besai ke deka ngaga genteran tusun ukum bekait enggau berita ke enda betul tauka berita bula (fake news).
“Kami di Perintah Menua Sarawak meri sukung kami ngagai Perintah Besai ke deka ngaga genteran tusun ukum bekait ke berita bula.
“Diatu kitai napi gaya teknologi ke besai endar lalu ketegal nya mega, sekeda orang peneka ati ngagai berita bula ke tau ngachau pengelikun sereta penyerakup menua,” ku iya.
Ba lansa bukai, ba penyendia Barisan Nasional (BN) napo Pengawa Bepilih Besai ke-14 (PRU14), iya madah Sarawak seruran besedia napi PRU14 ti deka digaga barang maya ari diatu.
“Sarawak, sebuah menua di Malaysia ke napi pengawa bepilih dua taun sekali, alai pengawa bepilih ke penudi iya endar digaga, iya nya Pengawa Bepilih Besai Nengeri ke-11 (PRN11) dalam taun 2016.
“Kami BN Sarawak seruran besedia (napi pengawa bepilih) dibanding enggau di Semenanjung Malaysia ke ngaga pengawa bepilih lima taun sekali, kitai di sarawak dua taun sekali.
“Reti nya, data enggau injin pengawa bepilih kitai agi baru tauka agi ‘angat’ endar. Ambika chunto, PRN11 (2016) sereta Pengawa Bepilih Mit (PRK) Tanjung Datu (Februari 2017). Pengawa ke berat kediatu, semina ngemanahka aja ‘injin’ sereta data kami,” ku iya.
Abdullah ti mega nyadi Ketuai Sekretari Politik Kepala Menteri madah, kelimpah ari ngemanahka agi injin pengawa bepilih, data ke bisi diatu mega patut dipansik enggau silik agi (lebuh napo PRU14).
Taja pan BN Sarawak sereta ijinsi ke bekait enggau PRU14 tu, enda ulih ngemuntangka pemerat PRU14 tu bansa nya aja, laban mayuh pekara ke dibantaika mungkur pekara ke bisi bekait enggau renggat nasional.
“Sigi amat pengawa kami di BN Sarawak bekimpin tang kami pan mesti beratika pekara ke dibantai nya ngipak enggau pemerat Sarawak.
“Dalam timpuh napo PRU14 tu, pengarang berita pan sama kiruh nyendiaka diri napi PRU14 bejalaika pengawa kitai enggau penuh tanggungjawab. Nyangka dalam timpuh ke diatu dalam kandang 10 hari tu kini, bai belelak dulu sebedau napo PRU14,” ku iya.
Ke sekali tu ( PRU ke14), Abdullah madah BN Sarawak deka bediri di 31 kerusi dibanding enggau 25 sebedau tu.
“Sarawak bisi 72 Kaban Kunsil Nengeri ( ADUN) BN, lalu enti nitih, sigi kami ADUN deka mantu 31 chalun BN ke deka bediri tu ila,” ku iya.