Bedau bisi ungkup ngaga Klinik Pengerai Gred 3 di Serian, ku Riot

SERIAN: Menteri Penguasa Pengereja Pengawa Datuk Seri Richard Riot Jaem besemaya deka majakka pengawa iya minta sebengkah agi perengka guna pengerai perintah digaga di Serian enggau naka pengelengkas.

Riot ti mega nyadi Kaban Parlimen (MP) Serian madah perambu ngaga Klinik Pengerai (KK)Gred 3 udah dikemendarka lalu endur ngaga projek nya pan udah bisi.

Iya madah munyi nya lebuh bejaku ba atur pengawa makai lemai ti diatur ulih Lembaga Pelawat Hospital Serian, hari Lima tu tadi, di Dewan Masyar- akat ditu, alai ku iya, taja pia kediatu, ungkup kena ngaga projek nya lalu bedau diungkupka.

“Aku deka majakka pengawa aku minta projek ngaga Klikik Gred 3 tu digaga di Serian,” ku iya.

Bedau lama tu tadi, surat berita menua tu bisi naburka berita madah pasal penyekut Sepital Serian lalu begunaka perengka guna ke enda ibuh bekunsi, ngambika ulih meri servis ke nyentuk agi ngagai mensia mayuh di pelilih menua Serian.

Taja pia, iya muji Sepital Serian laban meri pemujur servis ngagai rayat taja pan bisi penyuntuk sida iya empu.

“Aku patut madah, kita udah ngaga pengawa kita enggau naka pemanah, gawa ukai semina ke lebih 100,000 mensia mayuh ke diau di Serian tang nyengkaum ari luar Serian baka Simunjan enggau Sri Aman.

“Pajakka pemujur kita tu. Nyadi pengari kita, aku deka ngaga pengabis manah pengawa aku mantu kita ditu,” ku iya.

Ba pemansang bukai, Riot ngelalau sida ke gawa, ngerijista sida iya empu enggau Opis PERKESO ( tauka SOCSO), ke nyadi jamin enti sema sida iya bisi napo penusah maya gawa.

Iya madah nengah Skim Insurans Pekerjaan ( SIP), pengereja pengawa dijamin, dibayar gaji tiga bulan enti sida iya diketuka ari pengawa sida tauka enda gawa agi ketegal kompeni endur gawa nya udah tutup tauka orang ke bempu kompeni nya ‘lesap’.

Ba atur pengawa nya mega, Riot besemaya deka meri geran dalam penyampau RM35,000 ngagai sekeda gerempung baruh pegai Sepital Serian nyengkaum Lembaga Pelawat Hospital Serian (RM20,000), Kelab Perubatan Serian (RM5,000)enggau Komiti Ngerias Sepital Serian (RM5,000).